Angelina Mango, 22 vjeç, është fituesja e festivalit të Sanremo-s dhe do të përfaqësojë Italinë në Malmö, Suedi.

Angelina u shpall fituesja e edicionit të 74-të të Sanremo-s me këngën “La noia”, të cilën e kishte shkruar vetë ajo, së bashku me Dario Faini dhe Francesca Calearo. Votat e publikut u numëruan për të gjitha netët e e festivalit.

Pasi u përzgjodhën 5 finalistët, përmes një televotimi, publiku zgjodhi këngën e preferuar. Finalistët ishin:

Angelina Mango – “La noia”
Geolier – “I p’ me, tu p’ te”
Annalisa – “Sinceramente”
Ghali – “Casa mia”
Irama – “Tu no”

Angelina u shpall fituesja e festivalit dhe për të çmimi është shumë i rëndësishëm, pasi i ati i ndjerë, Pino Mango, ka marrë pjesë 7 herë në festival (nga periudha 1985-2007), por nuk e ka fituar asnjëherë trofeun.