Kim Kardashian po përkushtohet gjithnjë e më shumë në botën e kinemasë. Ylli i “The Kardashians” do të jetë një ndër producentet e dokumentarit mbi jetën e ikonës Elizabeth Taylor.
Sipas BBC Arts, Kardashian, Kari Lia, Hamish Fergusson dhe Passion Pictures do të jenë producentë në dokumentarin me tre pjesë “Elizabeth Taylor: Rebel Superstar”. Dokumentari do të ketë intervista me njerëz që e njihnin aktoren dhe fituesen e çmimit Oscar, duke përfshirë familjarët, miqtë dhe kolegët.
Dokumentari do të sjellë pamje dhe intervista nga arkivat, të papublikuara më parë, të cilat synojnë të tregojnë jetën e Taylor në një tjetër aspekt.
Kim gjithashtu do të shfaqet në një skenë të projektit dhe do të rrëfejë intervistën me Taylor, e cila u zhvillua në 2011-ën, para vdekjes së saj.
Në dokumentar do të jenë prezente edhe intervistat me Dame Joan Collins, Margaret O’Brien, Carole Bayer Sager dhe mjekun Anthony Fauci, të cilët kanë punuar pranë Taylor në luftën e saj kundër SIDA-s.
Elizabeth Taylor nisi karrierën e saj në fëmijëri dhe ka fituar një sërë çmimesh për performancat e saj. Jeta personale e aktores u vendos në qendër të vëmendjes, pasi ajo u martua 8 herë (2 nga të cilat me të njëjtin burrë) dhe vuante nga varësia nga substancat narkotike. Taylor ishte një zë i fuqishëm për kërkimet dhe luftën kundër sëmundjes së SIDA-s.
Ajo krijoi gjithashtu një linjë parfumesh dhe u përqendrua edhe te krijimi i bizhuterive.
Taylor ndërroi jetë në vitin 2011, në moshën 79-vjeçare, për shkak të sëmundjes së zemrës.
Artikuj të sugjeruar:
