Drini Zeqo, në një intervistë në “Ftesë në 5”, tregoi detaje nga jeta e tij private, duke nisur që nga divorci i prindërve, humbja e babait dhe shëndeti i motrës.
Drini tha se prindërit u ndanë dhe pesha e divorcit është shumë e rëndë. “Prindërit e mi ishin duke kaluar një situatë të vështirë divorci. Thënë kjo, ndonjëherë nuk pret që të të bien disa pesha në supe, që s’je gati t’i marrësh. Është shumë e vështirë kur ti flet me ta në telefon dhe dëgjon zërin e nënës, zërin që dridhet”.
Gazetari rrëfeu se u kthye nga Gjermania, për të mos u kthyer më. “Ata u ndanë, divorci i tyre ndodhi, jo shumë lehtë, me disa peripeci. Nuk besoj se çiftet ndahen në paqe, mund të jenë të rralla ndarjet në paqe”, për të vijuar se e motra ishte më e vogël dhe u ndikua nga divorci i prindërve dhe ndoshta ajo e ka ndjerë më shumë.
Ai tregoi se ka pasur shumë ulje-ngritje në jetë, por humbja e babait ka qenë më e forta:
“Nisi një rrugë e vështirë për mua, mamin dhe motrën. Jetesa u bë e vështirë. Puna, që nga ai moment në 2004 nuk ishte më një luks. Gjysma e të ardhurave të mia që nga ai moment kanë shkuar për familjen. Gjatë këtyre viteve ka pasur shumë ulje dhe ngritje, por më e forta ishte humbja e babait. Ka qenë një marrëdhënie normale, është kujdesur për problemet, por nuk ishte aty. Humbja e jetës së tij ishte e vështirë dhe duke mos e pasur më, gjithë dashurinë e orientuam te nëna”.
Ai u shpreh se i ati nuk kishte një sëmundje dhe shkaku i vdekjes ishte hemorragjia cerebrale:
“Rrethanat ishin të vështira, nuk vuante nga asgjë, vdiq në moshë të re, rreth 56 vjeç, i ra hemorragji cerebrale në zyrë dhe nuk i thamë dot as fjalët e fundit njëri tjetrit”, duke treguar se ra tre ditë në koma dhe më pas ndërroi jetë. “Unë u detyrova ta rrisja intensitetin e punës sime, media të merr pak energji, të merr kohë”, tha Drini.
Ai foli edhe për shëndetin e së motrës:
“Problematikat e motrës, janë një gjë shumë e shpeshtë kudo, por që pak flitet. Fillon me ca shenja të vogla për t’u agravuar. Ndonjëherë nisin me atë lodhjen, për të vazhduar te situata që nuk do të kesh kontakte me botën jashtë dhe është i nevojshëm kontakti me mjekun. Ne jemi në një situatë, ajo është një vajzë e rritur që është e pjekur mjaftueshëm për ta trajtuar, kjo është gjysma e punës”.
Më tej, ka treguar se si e përjetoi e motra largimin e tij nga “BBVA 3”:
“Më ka ndodhur një proces shumë i çuditshëm, sa shumë njerëz më ka thënë sa mirë bëre që fole për këtë se shumë njerëz kanë frikë dhe ankth që ta pranojnë. Gjithë kjo vala e madhe e kësaj mbështetjes, lidhet me faktin se njerëzit e kanë të vështirë ta pranojnë. Ajo më shihte, ishte e kënaqur, madje po e shijonte. Atë ditë e gjeta duke parë “Big Brother” dhe u habit, nuk e priste që kisha vendosur të lija “Big Brother”. E përqafova. Vendosa t’i qëndroja afër”.
Gazetari ka rrëfyer për humbjen e babait edhe gjatë qëndrimit në "BBVA 3", teksa bisedonte me konkurrentet Sara Gjordeni:
“Kam pasur shumë episode, shumë të vështira. Po edhe humbja e babit ishte… u ndamë kështu si të pa folur fare sepse atij i ndodhi një hemoragji cerebrale edhe ndenji vetëm 3 ditë në gjendje kome edhe nuk folëm dot më fare me atë,” u shpreh ai.
“Ishte pak ndarje e papritur dhe e sforcuar dhe mbeti çdo gjë në mes, e kupton. Kur mbetet çdo gjë në mes, sikur pritet me thikë dhe ti..."
Drini humbi të atin në vitin 2015, kur asokohe prezantonte programin “Tú sí que vales” në Vizion Plus.
“Këto kanë qenë ditë shumë të vështira. Dje humba një shok jete që çdo djalë nuk e zëvendëson dot. Një shok që herë grindesh e herë pajtohesh, por që të do dhe e do më shumë se çdo njeri në botë. Me dha një leksion të rëndësishëm, pa folur edhe këtë herë siç dinte ai ta bënte. Duhet të jetojme jetën me sinqeritetin për atë që ndiejmë, të mos lëmë asgjë për të nesërmen dhe të jetojmë të tashmen. Jeta është shumë e padrejtë disa herë, por ajo duhet jetuar me çdo të mirë apo të keqe,” u shpreh ai asokohe.
