Secili prej nesh ka pasur ditë jo të mira në jetën e vet. Ndonjëherë për shkak të motit, ndryshimi i stinëve, një problem i pazgjidhur, një ditë thjesht me vetëbesim të ulët, zhgënjimi nga një situatë e caktuar, arsyet mund të jenë kaq të shumta.
Por, ka një ndryshim të madh midis luhatjeve të humorit dhe depresionit. Nëse nuk i keni përjetuar në lëkurën tuaj, me gjasë që keni një shoqe apo shok në depresion. Leigh McInnis, një eksperte e shëndetit mendor në Newport Academy në Virxhinia tregon mënyrat se si duhet të flisni me këta persona.
Jini të përzemërt në atë që thoni
Fjalët e thjeshta dhe të sinqerta si: "Unë jam këtu për ty" dhe "Unë dua që ta dish se sa rëndësi ke për mua" janë më të mirat që mund t'i thoni një të personi në depresion. Jini të dhembshur për atë që po kalojnë duke u shprehur se ju vjen keq, ndërsa duhet t’i nxisni që të flasin me një profesionist.
Mos minimizoni dhimbjen e tyre
Nëse shoku/shoqja nuk do të hapet me ju, mos i shtyni më shumë. Ju nuk duhet t’i detyroni ata që po luftojnë me depresionin që të flasin, nëse nuk duan. Më e rëndësishmja, asnjëherë mos e minimizoni dhimbjen e tyre me komente të tilla si: “Kjo nuk është asgjë, ka edhe më keq”, ose “Hiqe mendjen nga mërzitja, thjesht gëzohu!” Duket sikur ju nënvlerësoni dhimbjen e tyre!
Nxitini ata të kërkojnë ndihmë
Kur një person është në depresion, gjëja më e mirë që mund të bëni është të jeni një mik/e e mirë duke dëgjuar dhe treguar mbështetje. Por, është po kaq e rëndësishme që t'i inkurajoni ata të kërkojnë ndihmë profesionale. Depresioni nuk është i njëjtë për të gjithë, ju duhet vetëm të kuptoni shenjat paralajmëruese te miku/ja juaj dhe të jeni aty për t’i ndihmuar.
