Kur nisi edicioni i tretë i “Big Brother Albania”, u bë me dije se kasti i këtij viti do të jetë më interesant se i vitit të kaluar dhe ndoshta kam një qasje dhe mendje (jo dhe aq) naive, por me “interesant” kuptoj më shumë kulturë, edukatë, biseda të gjalla dhe gallatë, sa më pak kunja dhe më shumë argëtim dhe respekt.
Mund të them, se qysh në ditën e katërt (e cila ende nuk ka përfunduar), edicioni i tretë i këtij programi është i mbushur me debate që ndodhin pa baza dhe arsye serioze. Fillimisht, Egla Ceno deri më tani nuk ka thënë një fjalë të mirë dhe luan rolin e një “edukatoreje që mban shënim se kush pastron e kush jo”; Meri Shehu, e cila që në momentin e parë (megjithëse mendova se do të ishte mjaft spontane dhe ‘funny’), përcaktoi se kush është i famshëm e kush jo; Roza Lati që po vendos barrierat me njerëz që sapo i ka takuar, por po e bën në mënyrën më të rëndë; Jul Deda që do të ecë në hapat e Luizit dhe së fundmi, Ilnisa Agolli që e çon debatin në pikat më të ulëta të një diskutimi.
Nga ana tjetër, ka banorë që as nuk u ndihet zëri, nuk janë fare protagonist dhe ndoshta as nuk e kanë idenë se ku janë dhe se ç’kanë në plan të bëjnë.
Nëse thjesht hedhim një sy në llogarinë e “BBVA 3” në Instagram, do të shohim vetëm reels-a ku sherret dhe debatet pa kokë e pa fund dominojnë. Por, pse është duke ndodhur diçka e tillë?
Arsyeja e parë mund të lidhet me dëshirën për të treguar se kush është më i forti – Në një shtëpi ku tashmë ka shumë personazhe e karaktere të ndryshme, secili do të jetë më agresiv se tjetri për të vendosur ca kufij në gjërat që toleron apo jo, si dhe për t’i treguar publikut se kush dominon dhe bie në sy.
Një tjetër arsye mund të lidhet me edicionin e mëparshëm të “BBVA”, ku duke parë ndikimin e jashtëzakonshëm të Luizit dhe personazheve të tjerë, banorët kanë sërish të njëjtën qasje, duke harruar se publiku kërkon diçka të re. E kemi thënë, stërthënë e do vijojmë ta themi: Publiku kërkon origjinalitetin! Herët a vonë, nëse dikush zgjedh një strategji të përdorur, do të dalë në personalitetin e tij dhe do të shfaqet në trajtën e zakonshme.
Karakteri i individëve – Natyrisht, kjo është arsyeja kryesore. Secili personazh ka karakterin e vet unik, këndvështrime dhe gjëra që nuk i toleron. Ajo që duhet pasur parasysh është se ata tanimë janë në një ambient të përbashkët dhe duhet të tolerojnë njëri-tjetrin dhe të dinë rregullat e bashkëjetesës, sidomos kur kanë mbi 100 kamera mbi krye.
Ne urojmë shumë që të ndryshojë e gjithë kjo situatë e nderë me 1001 kunja, konflikte, dëshirën për t’u dukur “luani i shtëpisë” dhe që banorët të dhurojnë humor dhe situata interesante, në mënyrë që të paraqiten në formën që duan te publiku.
