Ukraina dhe Rusia në një betejë dronesh

Rusia shprehet se ia ka dalë të parandalojë një sulm të madh ukrainas në territorin e saj, në të cilin përfshiheshin 24 dronë, që targetonin 5 rajone ruse, mes tyre edhe Moskën.

Sipas Ministrisë së Mbrojtjes në Rusi, mbrojtja ajrore rrëzoi dronet mbi Moskë, Briansk, Smolensk, Kaluga dhe Tula. Në këtë të fundit, një person u plagos, pasi droni goditi një ndërtesë banimi.

Nga ana tjetër, Ukraina u shpreh se Kievi u godit nga një sulm kolosal rus, më i madhi që kur ka nisur pushtimi i vendit nga ana e Rusisë. Mbrojtja e ajrit në Ukrainë tha se rrëzoi 71 dronë nga 75 në total. 60 prej tyre kishin si shënjestër Kievin. Si pasojë e këtij sulmi u plagosën 5 persona, mes tyre edhe një fëmijë 11 vjeç.

Pesë vende të BE-së mund të udhëtojnë pa viza në Kinë

Pekini ka lajmëruar se do të lejojë hyrjen pa viza në Kinë për Francën, Gjermaninë, Italinë, Holandën dhe Spanjën, shtetasit e të cilëve do të udhëtojnë në Kinë deri në 15 ditë pa vizë. Vendimi, i cili prek edhe Malajzinë, do të hyjë në fuqi nga 1 dhjetori dhe do të zgjasë për 1 vit.

Ky njoftim vjen pas vizitës së ministers së jashtme franceze në Pekin, Catherine Colonna.

Kina shprehu edhe përpjekjen për të nxitur më shumë njerëz që të vizitojnë vendin për biznes dhe për turizëm.

Një tërmet 5.4 ballë godet Tajvanin

Një tërmet me magnitudë 5.4 ballë, shkalla Rihter, ka goditur Tajvanin, në zonën e lindjes. Në njoftimin e Shërbimit Meteorologjik të Tajvanit thuhet se deri më tani nuk raportohen dëme materiale, të plagosur ose viktima, edhe pse banesat dhe institucionet u lëkundën për ca kohë.

Epiqendra e tërmetit ishte në detin e Tajvanit, në një thellësi 22.4 km.

Duke qenë se Tajvani ndohet në kryqëzimin e dy pllakave tektonike, tërmetet janë të shumta. Disa prej tyre kanë qenë edhe fatale, si ai i vitit 1999, me magnitudë 7,3, i cili shkaktoi rreth 2,000 viktima.

Më shumë mbështetje për Ukrainën nga Danimarka

Në një moment kur ndihmat për Ukrainën po fillojnë të zvogëlohen, Danimarka ka vendosur të rrisë mbështetjen ushtarake, duke ofruar 380 milionë dollarë ka thënë ministria e Mbrojtjes daneze.

Sasia e parave do i shtohet fondit prej 629 milionë paundëve që Danimarka është zotuar t’i shpenzojë për t’i ofruar Ukrainës donacione ushtarake, duke thënë se ky financim do të përfshihej në detyrimet e saj të aleancës, meqë është anëtare e NATO-s.