Ariana Grande, përmes një reflektimi të publikuar në Instagram, ka folur për herë të parë për marrëdhënien e saj me Ethan Slater, pak kohë pasi u nda nga ish-bashkëshorti, Dalton Gomez. Në rrëfimin e gjatë, Ari u shpreh se njerëzit e “kanë keqkuptuar” dhe se kanë bërë supozime për lidhjen e saj.
“Një prej viteve më transformues, sfidues dhe sërish, ndër më të lumturit dhe specialët në jetën time. Kurrë nuk e kam ndjerë më shumë mëshirën dhe pranimin e asaj që jeta ishte duke ma bërtitur që të ma mësonte. Kurrë nuk jam ndjerë më e përmbushur dhe prezente në punën time, duke qenë e aftë të gëzoj çdo moment. Dhashë gjithçka munda dhe ndoshta, kam dhënë zemrën dhe veten në projekte në të cilat isha mjaftueshëm me fat që të merrja pjesë dhe të mësoja kaq shumë nga çdo shpirt brilant dhe i bukur që pata privilegjin të krijoja art dhe të na kryqëzoheshin rrugët këtë vit”, u shpreh Ariana.
Më tej, vijoi:
“Nuk kam ndjerë kurrë më shumë krenari, lumturi dhe dashuri, ndërsa jam ndjerë shmë e keqkuptuar nga njerëzit që nuk më njohin”, tha Ari, duke nënvizuar se janë krijuar supozime nga zëra që thjesht bashkoheshin për të folur për jetën e saj.
“Nuk jam ndjerë kurrë më e mbrojtur nga ata që më duan dhe më kuptojnë (miqtë, familja dhe fansat). Ndihem e sigurt edhe në mes të shumë gjërave nga të cilat zakonisht kisha frikë. Unë po e dëgjoj dhe po e besoj veten time, edhe kur frika apo traumat më thonë të mos e bëj (diçka)”.
Ajo theksoi se është mirënjohëse për të gjitha ndjesitë e pashpjegueshme që ka përjetuar këtë vit, duke thënë se ndihet më njerëzore, më e butë dhe më e fortë në të njëjtën kohë.
“Po ju mbështjell të gjithëve me dashuri dhe ju uroj një Vit të Ri shumë të lumtur dhe të shëndetshëm. Nëse ndonjëherë ndiheni të keqkuptuar ose vetëm, mbani mend që do kalojë dhe se nuk jeni (vetëm ose të keqkuptuar). Merrni frymë thellë dhe dijeni se ju duan shumë. Mezi pres për vitin tjetër”, përmbylli këngëtarja dhe aktorja deklaratën e saj.
Këngëtarja 30-vjeçare u shpreh se reagon vetëm për gjërat që e meritojnë energjinë e saj dhe se po e mbron veten nga ato situata që ndikojnë në të.
Fituesja e çmimit Grammy u vendos në qendër të kritikave për lidhjen e saj me kolegun e serialit “Wicked”, Ethan Slater, i njohur edhe për rolin e tij si SpongeBob SquarePants. Interneti s’e priti aspak mirë hapin e saj të radhës, pasi Ethan, ishte i martuar me partneren e tij, Lilly Jay, që e kishte njohur që prej 10 vitesh dhe së bashku kanë një fëmijë të vogël.
Sipas zërave, Ethan ishte ende i martuar kur dilte me Ariana-n dhe ajo e ka takuar disa herë ish-bashkëshorten e tij (Ethan nënshkroi divorcin javën e kaluar) dhe le të themi që TikTok-ut, ky veprim i duket hipokrizi dhe sipas njerëzve në këtë rrjet social, Ariana s’është fare një “vajzë që mbështet vajzat”.
Burime pranë Lilly Jay thanë se ajo ndihet e tradhtuar dhe tmerrësisht keq që familja e saj u shkatërrua. “Ethan ia tha Lilly-t disa ditë para se të dilte thashethemi se ai dhe Ariana janë të lidhur dhe i tha se donte divorcin. Lilly s’e priste kurrë”. Një tjetër burim tha se Ariana dhe Ethan s’ishin fare të kujdesshëm, pasi kapeshin prej dore shpesh në mes të xhirimeve.
Sipas Daily Mail, Lilly ka dalë disa herë me Ethan dhe Ariana-n, e cila takoi bebushin e tyre, madje e mbajti edhe në krahë. Ata darkuan në Londër dhe Ariana i tha Lilly-t se donte të bëhej nënë. “Mezi pres të kem familjen time”, ishte shprehur Ari.
