Ylli Limani ka publikuar albumin e ri, të titulluar “Tjetër” dhe fansat e muzikës së tij (dhe jo vetëm) po e adhurojnë albumin. Nëpër rrjetet sociale, veçanërisht në YouTube dhe TikTok, ata kanë shprehur të gjithë vlerësimin dhe emocionet që përjetojnë kur dëgjojnë këngët e reja të projektit muzikor.

Sektori i komenteve në YouTube është mbushur me fjali të tilla si: “Melodi shpirti! Unik në muzikën shqiptare”; “Ah, ta dish ti Yll sa me fat jemi që kemi një artist si ti”; “Asnjëherë nuk zhgënjen me këngët e tua”; “Perlë”; “Albumi më i mirë që mund të dëgjosh”; “Thjesht e pastër, talent je Ylli! Faleminderit për këtë dhuratë Krishtlindjeje! Zoti të bekoftë!”; “Si një dhuratë për festa”; “U dashurova me albumin, me këngët, tekstet, muzikën”; “Albumi me këngët më të bukura”; “Art i pastër. Kjo është vlerë”; “Faleminderit që na dhuron këngë kaq të bukura”, janë disa prej komenteve të shumta që kanë pushtuar këngët e Yllit.
 
Edhe në TikTok, këngët e Yllit janë bërë trend nën hashtag-un #yllilimani.

Këngët e tij, këtë herë janë më të ndjeshme se zakonisht dhe mjaft të veçanta për artistin. Për shembull, muzika dhe teksti i këngës "Ndjenjë", janë krijuar nga i ati i Yllit; kënga "Sonte", një remake i  këngës së grupit ikonik "Marigona"; "Mos harro", e cilësuar nga Ylli si një prej këngëve më të veçanta të karrierës së tij; apo edhe "Nuk po ec", kënga e fundit e albumit, kushtuar atyre ditëve kur mendon se asgjë nuk ke në terezi.

 
“Premtoj lot & gëzim,” shkroi Ylli në Instagram kur na bëri me dije se do të sillte një album të ri. Sigurisht, e mbajti fjalën dhe mund ta aprovojmë, edhe ne kemi qarë aty te cepi me këngët e tij.