Fëmijët nuk kanë nevojë për një mal me lodra të reja për festat që të jenë të lumtur. Ka një mënyrë të thjeshtë për t'i mbajtur fëmijët të entuziazmuar për lodrat që kanë tashmë: duke u dhënë akses në vetëm disa prej tyre dhe duke lënë jashtë disa të tjera.

"Unë e zbatoj këtë praktike me lodrat në mënyrë që ato të duken ende të reja dhe emocionuese dhe ne nuk blejmë domosdoshmërisht ndonjë gjë të re," thotë Angela Narayan, profesoreshë e Psikologjisë Klinike të Fëmijëve në University of Denver.

Kjo taktikë funksionon mirë me lodrat më të mëdha, si shtëpitë e kukullave dhe grupet e mëdha Lego, çka i bën fëmijët të mos shtojnë rrëmujën nëpër shtëpi. "Unë i lë të luajnë me to dhe më pas i heq për disa javë ose dhe një muaj dhe thjesht u nxjerr disa lodra të tjera që i kanë pasur jashtë vëmendjes," shpjegon ajo.

“Strategjia funksionon mirë për shkak të psikologjisë dhe zhvillimit të kapacitetit të kujtesës së fëmijëve të vegjël,” thotë Narayan.

"Fëmijët në parashkollor nuk kanë aq kapacitet memorie afatgjatë sa ne, kështu që ata harrojnë më shpejt se të rriturit," shpjegon ajo. "Ata nuk lodhen nga gjërat aq lehtë dhe ky është vetëm një avantazh i trurit në zhvillim”.

Sa dhurata duhet t'u bëni fëmijëve të vegjël?

Nëse fëmijët shohin një sasi të madhe lodrash në të njëjtën kohë, kjo mund të jetë tepër stimuluese dhe ata nuk janë domosdoshmërisht në gjendje të dallojnë secilën lodër. "Edhe nëse një i rritur shkon në një dyqan lodrash, është e vështirë t'i kushtojë vëmendje gjithçkaje, imagjinoni fëmijët" thotë ajo.

Gjatë festave të fundvitit, Narayan cilëson se u ble fëmijëve vetëm një ose dy dhurata domethënëse që mund të mbajnë vëmendjen e tyre të angazhuar për një periudhë kohe.

Sigurisht, teksa fëmijët rriten, ky truk humbet efektivitetin dhe ata mund të mos jenë më të interesuar për lodrat që dikur i emociononin.

Burimi: Today