Ylli Limani do të festonte së bashku me njerëzit në club 28 Nëntorin, por një ngjarje e papritur e bëri të anulonte performancën. Përmes një postimi në Instastory, Ylli njoftoi se për fat të keq, nuk do të performante në club-in e njohur në Prishtinë.
“Sonte është festa më e madhe e krejt shqiptarëve, 28 Nëntori. Sonte do të festonim bashkë. Pikërisht sonte, pas një lajmërimi të rremë për eksploziv, eventi është anuluar. Po ndihem tepër keq për krejt ju që keni rezervuar dhe jeni bërë gati për të dalë, krejt kjo për shkak të ligësisë së njerëzve që kushedi se si kqyrin për të përfituar prej veprimeve të tilla”, shkroi Ylli.
Ai publikoi edhe një video të ambienteve të club-it para se policia të largonte njerëzit.
Më tej, në një tjetër postim shkroi: “Të gjithë do të këndojmë dhe festojmë bashkë. Sa të kemi jetë. Do të shihemi shpejt”.
Një situatë e ngjashme, por jo me alarm të rremë ka ndodhur edhe për reperët Mozzik dhe Getinjo. Disa kohë më parë, në një club në Gjilan, policia ka evakuuar njerëzit nga një club, ku po performonin reperët. Djemtë reaguan me postime në Instagram, ku u shprehën: “Përshëndetje, Gjilan i dashur! Sot duhet të këndonim. Na falni të gjithëve që nuk mundëm të vazhdonim me programin, pasi dikush ka hedhur një granatë dore para lokalit, por shyqyr Zotit, nuk ka shpërthyer granata. Policia është detyruar të bllokojë të gjithë vendin dhe t’i nxjerrë njerëzit jashtë”.
