Pasi “luftoi” për pafajësinë e saj për gati pesë vjet, Shakira arriti një marrëveshje me drejtësinë spanjolle. E akuzuar për mospagim dhe fshehje të të ardhurave në kompani offshore (kompani e regjistruar në një juridiksion tjetër nga vendi juaj i origjinës; qëllimi është përfitimi nga ligjet e favorshme tatimore ose mjedisi ekonomik në një vend të huaj), këngëtarja rrezikonte seriozisht dënimin me burg.
Ajo i tha gjyqtarit kryesues, José Manuel del Amo, se pranon marrëveshjen me prokurorët duke pranuar kësisoj akuzat e ngritura ndaj saj dhe vendimin për t’i paguar qeverisë spanjolle një gjobë prej shtatë milionë eurosh.
Sipas marrëveshjes, Shakira do të marrë një dënim me kusht trevjeçar, si edhe do të paguajë gjobën për të cilën ka dakordësuar me drejtësinë spanjolle.
Gjyqi, në të cilin pretendohej se do të dëshmonin mbi 100 persona në ditët në vijim, u ndërpre vetëm tetë minuta pas hapjes, sepse këngëtarja arriti menjëherë marrëveshjen.
Shakira tha në një deklaratë të siguruar nga kompania e saj ligjore se arriti në një marrëveshje për të mirën e fëmijëve dhe karrierës së saj.
“Kam marrë vendimin për ta zgjidhur përfundimisht këtë çështje me interesin më të mirë të fëmijëve të mi, të cilët nuk duan ta shohin nënën e tyre të sakrifikojë mirëqenien e saj personale në këtë luftë,” u shpreh Shakira. “Më duhet të kaloj stresin dhe presionin emocional të viteve të fundit dhe të fokusohem në gjërat që dua, fëmijët e mi dhe të gjitha mundësitë për t’u fokusuar në karrierën time,” cilësoi ajo.
Prokurorët pretendonin se artistja kolumbiane jetoi më shumë se gjysmën e periudhës së viteve 2012-2014 në Spanjë dhe për këtë arsye duhej të kishte paguar taksat në vend, edhe pse rezidenca e saj zyrtare ishte në Bahamas.
Artistja kolumbiane ka dy fëmijë, Milan, 10 vjeç dhe Sasha, 8 vjeç, nga raporti me ish-partnerin, Gerard Pique.
Burimi: Page Six
