Përshëndetje shpirtra kuriozë! Meqë po shkojmë me plis drejt Gjermanisë, pas rezultatit të djeshëm 1-1 me Moldavinë, le të flasim pak për trajnerin, i cili meriton gjithë mirënjohjen dhe meritat për këtë sukses historik.
Që ta dini, Sylvinho (Sylvio Mendes Campos Júnior), ka lindur në Brazil më 12 prill 1974, domethënë është Dash. Kjo shpjegon shumë gjëra, si për shembull:
Do të jetë gjithnjë i pari
Dashi, si shenja e parë e horoskopit nuk ndalet derisa të jetë në krye të listës. Me rezultatet dhe performancën e paparë, Sylvinho e ka arritur dhe ka tejkaluar pritshmëritë. Për momentin, është trajneri që ka sjellë një ndryshim shumë të madh në ekip dhe në cilësinë e lojës që bëjnë djemtë e kombëtares.
Ka pasion, guxim, motivim
Dashi i ka të trija këto super cilësi. Sylvinho e ka motivuar ekipin në çdo ndeshje dhe jashtë saj, ka guxuar të bëjë pjesë të kombëtares të rinj që më parë kanë qëndruar në stol, ose s’e kanë pasur mundësinë që të performojnë, si dhe ka një pasion frymëzues për futbollin e bukur, emocionues dhe për t’u dhënë tifozëve më të mirën.
Ka një energji që s’gjejmë fjalë ta përshkruajmë
Më falni, e keni parë Sylvinho-n si vërtitet në fushë? Është kudo, kurdo! Madje, jo vetëm në fushë, por edhe jashtë saj. Gazetari sportiv, Ylli Aga, është shprehur: “Puna që po bën Sylvinho, është se po sillet si një trajner klubi, në kuptimin e mirë. Është maksimalisht i përkushtuar te puna e tij. Çdo ditë në zyrë, punë me stafin, video e analiza pa fund”.
Ka rrëmbyer zemrat e çunave të ekipit dhe tifozëve
Vieë this post on Instagram
Le të flasim troç: Një Dash, me gjithë ato episodet nevrike, ta merr zemrën. Është një shenjë që thjesht s’i mban dot inat, do veç ta përqafosh dhe ta mbash gjithnjë në zemër. Sylvinho e ka treguar se ka marrë zemrat e djemve të skuadrës, të cilët jo vetëm flasin me shumë respekt për të, por edhe në momentin që bëjnë gol, shohin drejt tij dhe në momentin e përfundimit të ndeshjes, është personi i parë që përqafojnë.
Komentet e tifozëve nëpër postimet e tij janë përherë pozitive: "Je më i miri mjeshtër", "Trajneri që duam" dhe shumë emoji me zemra dhe duartrokitje mbushin sektorin e komenteve në llogarinë e tij.
Si Dash tipik, trajneri është modest
Sylvinho nuk fluturon shumë larg, përkundrazi, vëzhgon dhe bën hapa të sigurt. Ai, në shumë intervista, e ndal pak hovin e tifozëve dhe tregon se ende kanë shumë rrugë për të bërë, duke qëndruar modest karshi komplimenteve dhe me këmbë në tokë karshi pritshmërive.
Jep dhe merr besim
Sylvinho ka treguar se ka besim tek ekipi dhe tek talentet e reja. Ai nuk hezitoi aspak të thërriste në ekip Jasir Asanin, Mario Mitajn, Taulant Seferin e të tjerë futbollistë që më parë nuk kanë pasur këtë njohje. Nga ana tjetër, djemtë bëjnë gjithçka për t’i treguar se kanë besim në skemat dhe profesionalizmin e tij.
Zbulon njerëzit e talentuar
Vieë this post on Instagram
Një Dash ka dëshirë të rrethohet nga njerëz të talentuar dhe ka një sy shumë të mprehtë kur vjen puna për t’i zbuluar ata. Sylvinho, sigurisht, nuk mund të bënte përjashtim.
Bëhet pjesë e festës
Sylvinho, ndoshta s’e njeh aq mirë kulturën shqiptare, por emocionohet sa herë dëgjon “Mora fjalë”, apo kur sheh djemtë e tij teksa lotojnë nga lumturia. Një Dash e gjen veten kudo, përshtatet, bëhet pjesë e festës, edhe nëse nuk e kupton shumë qartë se ç’po ndodh përreth. Mjafton energjia e duhur, njerëzit e duhur dhe ja, festa i përfshin të gjithë.
Artikuj të sugjeruar:
