Presidenti turk Erdogan shpreson që  Putin dhe Zelenski të takohen në Stamboll

Presidenti i Turqisë, Rexhep Tajip Erdogan thotë se në 48 orët e ardhshme, pret që të ketë biseda telefonike me homologun e tij rus Vladimir Putin dhe atë ukrainas Volodimir Zelensky. 

Kreu turk shpreson se Putin dhe Zelensky do të takohen në Stamboll për t’i dhënë fund konfliktit midis Rusisë dhe Ukrainës.

“Rezultati është pozitiv, nuk është tamam ashtu siç donim, por do të jetë më mirë. Nuk jemi pa shpresë,” -tha Erdogan nga Stambolli të premten pas një pyetjeje në lidhje me bisedimet Ukrainë-Rusi.

Ai shtoi se shpreson shumë që krerët e vendeve përkatës ta pranojnë ftesën e tij dhe të shkojnë për bisedime paqeje.

Turqia ka një profil dhe pozicion unik në lidhje me këtë çështje. Përveç të qenit anëtar i NATO-s, vendi kufizohet me Ukrainën dhe Rusinë. Ndër të tjera, Turqia është partneri më i madh tregtar i Rusisë në rajonin e Lindjes së Mesme dhe Afrikës së Veriut.

Kryeministri ukrainas: Mariupol është "katastrofa më e madhe humanitare" e këtij shekulli"

Denys Shmyhal, kryeministri ukrainas, e quajti situatën në Mariupol si "katastrofën më të madhe humanitare të shekullit", ndërkohë që pjesa jug-lindore e vendit vazhdon të përballet me bombardime konstante prej forcave ruse.

Sipas tij, ushtarët rus po shkatërrojnë "absolutisht gjithçka atje", përfshirë edhe vendet që civilët kanë sajuar për të qëndruar gjatë kësaj periudhe. Sipas raporteve ukrainase, më shumë se 20,000 njerëz kanë ndërruar jetë që prej fillimit të sulmeve atje e ndërsa 10,000 të tjerë kanë "ngecur" në Mariupolin e pushtuar prej tyre që nga 1 marsi.

Sulmohet xhamia dhe shkolla fetare në Konduz, të paktën 33 viktima

Gjatë lutjeve të djeshme (22 prill) mbetën të vrarë të paktën 33 vetë dhe 43 të tjerë u plagosën pas një sulmi në xhami dhe shkollë fetare në Konduz, Afganistanin verior. Sipas autoriteteve vendase, një pjesë e mirë e viktimave janë studentë. 

Zaibulah Mujahid, zëvendësministri i Kulturës dhe Informacionit taliban, tha se sulmi ndodhi në qytetin Imam Saheb në provincën Kunduz dhe se talibanët e dënuan krimin dhe shprehën ngushëllimet e tyre më të thella për viktimat. Sulmi i sotëm është i fundit në një seri sulmesh vdekjeprurëse në të gjithë Afganistanin.

Deri më tani, askush nuk e ka marrë përgjegjësinë për sulmin, por dega afgane e të ashtuquajturit Shteti Islamik mori sot përgjegjësinë për një seri bombash të kryera një ditë më parë.

Zelensky: "Sulmet në Ukrainë janë vetëm në fillimin e tyre"

Presidenti ukrainas Volodymyr Zelensky është ndalur tek një nga komentet e një komandanti rus, i cili tha se Moska do  të marrë kontrollin e Ukrainës Jugore. Sipas presidentit kjo tregon se Rusia është gati të sulmojë vende të tjerë dhe se pushtimi i Ukrainës është vetëm fillimi.

"Pra, kjo konfirmon vetëm atë që unë kam thënë prej fillimit. Ukraina është vetëm fillimi për rusët, ata duan të sulmojnë vende të tjera. Sigurisht që ne do ta mbrojmë vetes për aq kohë sa të jetë e nevojshme nga ambicia e tyre, por edhe vendet e tjera duhet të luftojnë me ne. Duhet të na ndihmojnë sepse jemi të parët në këtë rrugë. Kush vjen pastaj? Të gjithë ata që mund të jenë të radhës dhe zgjedhin të qëndrojnë neutralë sot, janë në një risk të madh. Do të humbisni gjithçka."- është shprehur Zelensky.

Burimi: BBC, CNN