Java e Modës në Paris do të thotë shkëlqim, luks, fustane elegante dhe make up që bie në sy! Kjo mund të jetë një formulë klasike protagonizmi për shumë të famshëm, por jo për Pamela Anderson, që trondi botën kur u shfaq në një nga ngjarjet më të rëndësishme të modës krejtësisht pa grim. U desh pak kohë që mediat të mësoheshin me pamjen “ujë dhe sapun” të ish-yllit të Baywatch, por Anderson sapo zbuloi se të bëhej virale nuk ishte qëllim në vetvete.
“Unë rri pa grim në shtëpi, kështu që pse jo për Javën e Modës në Paris?” tha ajo gjatë një interviste për “People”. “Vërtet nuk e dija se dikush do e vinte re këtë detaj, por më vjen mirë që dhashë një mesazh pozitiv”.
Pamela shtoi se shfaqja pa grim shkon paralelisht me qëndrimin e saj ndaj plakjes. “Unë e quaj procesin jetë, jo plakje. Ndjekja e rinisë është e kotë. Gjithçka që mund të bëjmë është të përqafojmë atë që jemi për momentin dhe të qëndrojmë fort në këmbët tona. Thjesht dua të ndihem rehat në lëkurën time," tha ajo.
Nuk dihet nëse ajo do vazhdojë të dalë sërish pa grim në shfaqje dhe evente të mëdha, por Pamela thotë se kurrë nuk i dihet. "Unë nuk jam kundër make up-it, thjesht nuk dua të jem pjesë e lojës dhe e kësaj industrie," shpjegoi ajo.
Për momentin, prioritet absolut në jetën e Pamela Anderson është të qenit një nënë e mirë për fëmijët e saj, Brandon dhe Dylan, të cilët kanë ardhur nga martesa me ish-bashkëshortin, Tommy Lee.
Burimi: Instyle
