Gjirokastër/ Rriten rastet me kancer gjiri

Spitali i Gjirokastrës “Omer Nishani” po mundëson mamografinë falas, në kuadër të “Tetorit rozë”, duke motivuar kështu vajzat dhe gratë që të bëjnë check up. Rreth 40 vizita kryhen çdo ditë në spital dhe nga raportet, 3% janë diagnostikuar me patologjitë e sëmundjes së kancerit të gjirit.

Sipas mjekut Ermir Mahilaj, në deklaratën e tij për Euronews: “Për pranimin e rasteve deri tani po kryhen rreth  40 ekzaminime çdo ditë, të cilat pothuajse janë të pranueshme dhe kemi pasur raste të patologjive të gjoksit 2-3% në ditë, ka pasur 1-2 raste të cilat kanë qenë patologji por flasim deri në këto momente që është fillim muaji ka pasur 6-7 raste, të cilat  kanë projeksionin për patologji të gjoksit”.

Mjekët kërkojnë që të rritet ndërgjegjësimi në zonat rurale: “Ne më shumë ndjeshmërinë e kemi për qytetin e Gjirokastrës dhe ndërkohë, kryesisht nga që janë edhe zona rurale, kanë vështirësi me transportin dhe probleme të tjera. Vitin e kaluar kemi pasur edhe Delvinën dhe Sarandën që kanë ardhur kanë kryer ekzaminime në qytetin tonë”,- u shpreh mjeku.

Florida/ Uragani Milton godet vendin

Uragani Milton ka goditur vendin, duke shkaktuar dëme masive dhe duke lënë mbi 2 milionë njerëz pa energji elektrike. Milton, një uragan erërat e së cilit shkojnë deri në 251 km/orë, po rrezikon komunitetet bregdetare. Njerëzit janë evakuuar në mënyrë të menjëhershme dhe miliona njerëz kanë lënë shtëpitë për të shkuar në zona më të sigurta.

Për më tepër, ekziston rreziku që mbeturinat që la stuhia Helene, e cila goditi sërish Florida-n dy javë më parë, të jenë ende prezente dhe të kalojnë në ajër, për shkak të erërave të rrëmbyera të Milton. Kjo shton edhe më shumë rrezikun për banorët në vend.

Gaza/ Mbi 400,000 njerëz nuk kanë ku shkojnë, pasi nuk ka një zonë të sigurt

Mbi 400,000 palestinezë kanë ngecur në veri të Gazës, pasi nuk ka një zonë të sigurt ku mund të shkojnë dhe të strehohen. Shifrën e lartë e bëri me dije Philippe Lazzarini, Komisioneri i Përgjithshëm i Agjencisë së OKB-së për Refugjatët në Palestinë. Ai, përmes një postimi në X u shpreh se “ky ferr nuk ka fund”.

“Ky operacion i fundit ushtarak kërcënon edhe zbatimin e fazës së dytë të fushatës së vaksinimit ndaj poliomielitit për fëmijët. Fëmijët janë si kurrë më parë, të parët dhe më të shumtët që vuajnë. Ata meritojnë shumë më mirë, ata meritojnë një armëpushim tani, ata meritojnë një të ardhme”, shkroi ai, duke theksuar se shumë njerëz po refuzojnë që të zbatojnë urdhrat e Izraelit, pasi thjesht nuk kanë ku strehohen.

Izrael/ Irani kërcënohet sërish me një “sulm të beftë dhe vdekjeprurës”

Izraeli, me një tjetër deklaratë kërcënuese, ka thënë se Irani mund të përballet me një sulm të beftë, të saktë dhe vdekjeprurës. Përmes një deklarate, ministri i Mbrojtjes në vend, Yoav Gallant, përforcoi edhe kërcënimin e kryeministrit izraelit, Benjamin Netanyahu.

Më herët, u konfirmua se Joe Biden dhe Benjamin Netanyahu do të bëjnë një telefonatë, për të diskutuar mbi përshkallëzimin e situatës në Lindjen e Mesme dhe sulmet e shumta mes Izraelit, Libanit dhe Gazës.