Dokumentari “Beckham”, i ftuar rishtazi në Netflix, ka marrë të gjithë vëmendjen dhe jo pa shkak. Ndryshe nga ç’pritet nga një dokumentar i zakonshëm, ku tregohet thjesht jeta e një personazhi, me disa video nga e shkuara dhe intervista, “Beckham” i përfshin këto, pa diskutim, por me një humor të hollë dhe shumë karizmatik.
Me pjesëmarrjen e Victoria-s, e cila është si qershia mbi tortë, dokumentari bëhet dhe më i lezetshëm. Znj. Beckham thotë se “Asokohe s’e pëlqente futbollin dhe ende nuk e ka qejf”. Ajo tregon situata të ndryshme të marrëdhënies së tyre shumëvjeçare, takimet në parking, kur ajo ishte ende Posh Spice, pjesë e Spice Girls, momentet e trishta, çaste nga fëmijëria dhe shumë të tjera.
Regjisori, Fisher Stevens, e ndjek ish-futbollistin dhe drejtuesin e klubit Inter Miami nëpër shtëpi dhe i bën pyetje të ndryshme. Beckham u përgjigjet të gjithave me mirësjellje, humor dhe me një ton shumë të gjallë.
Dokumentari tregon David në rini dhe miqësinë e tij me Sir Alex Ferguson. Marrëdhënia e tyre është shumë e bukur dhe e këndshme. Beckham thotë se Ferguson është si një figurë atërore për të, por përshkruan edhe se si iu thye zemra kur ata ndanë rrugët dhe prishën miqësinë e tyre.
Ai tregon mbi marrëdhënien e të atit, Ted, i cili ishte shumë strikt dhe nënës, Sandra, një zonjë plot vlera.
Nga ana tjetër, Victoria, shfaqet si një personazh shumë i ngrohtë dhe shumë e sinqertë. I gjithë dokumentari është i mbushur me emria të famshëm dhe me dëshmitë e tyre, duke treguar kështu të gjithë trashëgiminë dhe gjurmët e pashlyeshme që Beckham ka lënë në futboll. Cantona, Ronaldo Nazário, Pauls Scholes and Ince, Roy Keane dhe Rio Ferdinand shfaqen në serial. Surprizë e këndshme është edhe Anna Wintour, e cila është cool dhe e mprehtë.
Sigurisht, ekzistenca e David Beckham nuk lidhet vetëm me futbollin, por me një rrugëtim të bukur dhe të vështirë. Ai nisi si një futbollist i cili në fillim të karrierës, qëndronte edhe në stol, duke u kthyer në një superstar jo vetëm në sport, por edhe në modë.
Një pjesë e rëndësishme e dokumentarit është edhe martesa e tij me Victoria-n, e cila ishte në titujt e mediave për shumë gjatë. Victoria tregon disa nga situatatat kur David e ka trishtuar, Beckham, momentet e vështira me tifozët, të cilët e pështynin në rrugë, vetëm për një lojë futbolli, tradhtinë e supozuar, madje edhe modelet e tij të ndryshme të flokëve, si dhe vendimin për të veshur një kostum lejla në dasmë.
I gjithë dokumentari është fantastik, prekës, aspak i mërzitshëm, i sinqertë dhe i mbushur me humor dhe situata të këndshme, të cilat ia vlen patjetër t’i shohësh.
Pra, sugjerimi ynë për këtë fundjavë? “Beckham” në Netflix!
