Rindërtimi i Ukrainës pas luftës: Liderat mblidhen në Zvicër
Udhëheqësit nga dhjetëra vende dhe organizata ndërkombëtare janë mbledhur në Lugano të Zvicrës për të diskutuar dhe krijuar një plan që do të ndihmojë në rindërtimin e Ukrainës së dëmtuar nga lufta.
Përpjekja e rindërtimit është krahasuar me Planin Marshall të udhëhequr nga SHBA për të rindërtuar Evropën pas Luftës së Dytë Botërore.
Nën emrin Konferenca e Rimëkëmbjes së Ukrainës , ndërkombëtarët synojnë të koordinojnë përpjekjet për të ndihmuar edhe më shumë vendin në luftë. Rindërtimi i Ukrainës u quajt si "detyrë e përbashkët" nga presidenti Volodymyr Zelensky, teksa i drejtohej liderave të tjerë në konferencë.
Konferenca dy-ditore, e mbajtur nën masa të rrepta sigurie në Lugano ishte planifikuar shumë përpara pushtimit të Rusisë më 24 shkurt.
Përgjaken festimet e 4 korrikut në USA: Sulmi me armë shkakton viktima
6 persona mbetën të vrarë dhe të paktën 24 të tjerë janë plagosur pas një sulmi me armë zjarri në një rrugë ku po mbahej një paradë me rastin e 4 korrikut, në periferi të Chicago-s.
Dëshmitarët e rastit thanë se kishin parë trupa të gjakosur të mbuluar me batanije, ndërkohë që qindra njerëz vraponin për t’iu larguar rrezikut. Autoritetet i kërkuan qindra njerëzve që ndodheshin atje të largoheshin menjëherë pasi zona nuk ishte e sigurtë. Aktualisht autoritetet kanë arrestuar të dyshuarin kryesor për sulmin tragjik, një 22- vjeçar.
Kulla Eiffel thuajse në gjendje të mjerueshme: Nevojë urgjente për riparime!
Kulla më e famshme e botës ka nevojë të menjëhershme për riparim të plotë, por nga raportimet vendase çfarë po i bëjnë në të vërtetë është një rinovim sipërfaqësor sa për Lojërat Olimpike 2024 që do të mbahen në Paris.
“Nëse Gustave Eiffel do të vizitonte vendin, ai do të pësonte një atak në zemër,”- u shpreh njëri prej menaxherëve të kullës. Eiffel, kompania e të cilit projektoi dhe ndërtoi monumentin, kishte thënë asokohe se identifikimi dhe ndalimi i përhapjes së ndryshkut ishte sfida më e madhe për jetëgjatësinë e kullës dhe sugjeroi se ajo do të kishte nevojë për lyerje çdo shtatë vjet.
Kulla aktualisht po i nënshtrohet një rilyerjeje prej 60 milionë eurosh si parapërgatitje për Lojërat Olimpike të 2024-ës. Kjo është hera e 20-të që monumenti rilyhet.
Në një raport të publikuar në 2016 zbuloi se kulla kishte rreth 884 defekte, përfshirë 68 që thuhej se përbënin rrezik për “qëndrueshmërinë” e strukturës.
Sulmi tragjik në Copenhagen: Sipas autoriteteve s'ishte sulm terrorist
Policia në Danimarkës beson se sulmi me armë zjarri në një qendër tregtare ku si pasojë u vranë tre persona dhe katër të tjerë u plagosën rëndë, nuk ka të bëjë me terrorizëm. I arrestuari si autori që i mori jetën 3 njerëzve dhe plagosi shumë të tjerë, do të qëndrojë i mbyllur për 24 ditë në psikiatri për shkak të problemeve me shëndetin mendor.
Sulmi me armë zjarri në një qendër tregtare në periferi të kryeqytetit cilësohet si pa paramendim. Kryeinspektori i policisë së kryeqytetit danez tha se autori i dyshuar për sulmin, ka vepruar i vetëm pa ndonjë plan konkret, ndërsa ka qëlluar në mënyrë të rastësishme ndaj të viktimave të tij.
Burimi: BBC, CNN
