Nëse dikush vendos të bëjë një kërkim në internet për të gjetur se kush është njeriu më i lumtur në botë, emri "Matthieu Ricard" do të shfaqet te rezultatet.

Matthieu Ricard, 77 vjeç, është një një murg budist tibetian me origjinë nga Franca, i cili është shpallur "njeriu më i lumtur në botë.”

Ky “titull” daton vite më parë, kur ai mori pjesë në një studim 12-vjeçar mbi trurin, altruizmin dhe meditimin, të udhëhequr nga neuroshkëncëtarë të University of Wisconsin.

Altruizmi - parimi dhe praktika e shqetësimit për mirëqenien dhe/ose lumturinë e njerëzve, kafshëve etj; mund të konsiderohet si e kundërta e egoizmit.

"Skanimet treguan se kur mediton për altruizmin, truri i Ricard prodhon një nivel të valëve gama - ato të lidhura me ndërgjegjen, vëmendjen, të mësuarit dhe kujtesën - të paraportuara më parë në literaturën e neuroshkencës,” është shprehur udhëheqësi i studimit, neuroshkencëtari Richard Davidson.

Ricard – i cili ka thënë se ndonjëherë mediton për ditë të tëra pa u mërzitur – pranon se është një person përgjithësisht i lumtur, edhe pse ai mendon se titulli "njeriu më i lumtur" është një mbivlerësim i medias.

Këshilla e tij për lumturinë lidhet me altruizmin. Arsyeja, sipas tij, është sepse të menduarit për veten dhe si t'i përmirësojmë gjërat gjatë gjithë kohës, është rraskapitëse dhe stresuese.

Nëse dikush dëshiron të jetë i lumtur, Ricard thotë se duhet të përpiqet të jetë "dashamirës", gjë që jo vetëm që do ta bëjë të ndihet më mirë, por gjithashtu do t'i bëjë të tjerët ta pëlqejnë më shumë.

Ai paralajmëron se kjo nuk do të thotë se duhet t'i lini njerëzit e tjerë të përfitojnë prej jush, por në përgjithësi duhet të përpiqeni të jeni të sjellshëm.

"Nëse mendja juaj është e mbushur me dashamirësi, pasion dhe solidaritet, kjo është një gjendje shpirtërore shumë e shëndetshme,” ka thënë Ricard në Forumin Ekonomik Botëror në Davos, Zvicër.

"Me stërvitje mendore, ne gjithmonë mund ta sjellim [nivelin tonë të lumturisë] në një nivel tjetër," shpjegoi Ricard.

"Është si vrapi. Nëse stërvitem, mund të vrapoj në një maratonë. Mund të mos bëhem kampion olimpik, por ka një ndryshim të madh midis stërvitjes dhe jostërvitjes. Pra, pse nuk duhet të zbatohet kjo për mendjen?”

Filloni duke menduar gjëra të lumtura për 10 deri në 15 minuta në ditë, shpjegoi murgu. Pra, nëse e praktikoni këtë për 50+ vjet siç ka bërë ai, mund të gjeni lumturinë e kërkuar.