Shërbimi postar është një pjesë integrale e jetës së shumëkujt, sepse ne bëjmë dërgesa kudo në botë, marrim të tilla nga të afërmit, miqtë, apo dërgesa për çështje pune, etj. Pavarësisht vëllimit masiv, jo gjithçka që dërgohet me postë është në listën e miratuar. Kjo sepse siguria është shqetësimi kryesor.

Çdo artikull që përbën rrezik për shëndetin, sigurinë, pronën apo mjedisin kalon në “filtrat” e sigurisë për shërbimin postar të çdo vendi në botë, përfshirë edhe Shqipërinë.

Ja tetë gjërat që nuk duhet t’i dërgoni me postë:

Alkooli

Një shishe verë, pije alkoolike ose birrë mund të jetë një shenjë mirënjohje, por mos u përpiqni ta dërgoni atë me postë. Çdo pije me përmbajtje alkoolike prej 0,5% ose më shumë është e ndaluar të postohet.

Kafshë shtëpiake

Qentë, macet dhe disa kafshë shtëpiake të tjera të zbutura nuk mund të dërgohen me postë, për arsye të dukshme: ata kanë nevojë për kujdes, duke përfshirë ushqimin dhe ujin, gjatë transportit.

Frutat dhe perimet e freskëta

Mund të dërgoni fruta dhe perime të freskëta nëse i mbani të thata dhe i parandaloni që të prishen gjatë transportit. Por nëse mund të rrjedhë, ka erë të keqe ose të shkaktojë rrëmujë, posta nuk do ta dërgojë atë.

Kanabis

Ju ndalohet të dërgoni lëndë narkotike përmes postës edhe nëse është e ligjshme në shtetin tuaj. Produktet e kërpit që mund të dërgohen me postë duhet ta kenë përmbajtjen e THC -së 0.3% ose më pak.

Termometra

Termometrat e stilit të vjetër, aparatet e tensionit dhe barometrat që përmbajnë merkur të lëngshëm nuk mund të dërgohen me postë. Ato mund të dëmtohen ose thyhen gjatë procesit të transportit, gjë që mund t'i rrezikojë njerëzit.

Paratë CASH

Sistemet postare nuk ju ndalojë që të dërgoni cash, por ju këshillojnë të mos e bëni këtë. Nuk ka asnjë garanci se paratë do të arrijnë tek marrësi, pasi mund të vidhen ose humbasin gjatë transportit.

Manikyr

Shërbimi Postar lejon që të dërgoni manikyr për thonjtë nëse ai nuk është i ndezshëm dhe nuk përbën rrezik sigurie. Rregulla të tjera kanë të bëjnë me paketimin e manikyrit dhe mënyrën se si dërgohet.

Parfume

Parfumi, nëse përmban alkool, hyn në kategorinë e produkteve të ndaluara për t’u transportuar në botë. Mund ta dërgoni brenda vendit duke përdorur transportin tokësor, por duhet të kujdeseni që ta paketoni siç duhet.

Po në Shqipëri, cilët mallra ndalohen?

Ndalohen sendet, për të cilat është i ndaluar importimi apo qarkullimi në vendin e destinacionit. Ndalohen monedhat, biletat e bankës, kartëmonedhat, çeqet e udhëtimit, platin, ar, sende të çmueshme.
Ndalohet dërgimi nëpërmjet shërbimeve postare ose marrja në dorëzim prej tyre e kolive që përmbajnë sende që për natyrën e tyre paraqesin rrezik për jetën dhe shëndetin e njerëzve, siç janë lëndët plasëse, narkotike, djegëse dhe radioaktive, helmet, armët, e të tjera të kësaj natyre si edhe e atyre që përmbajnë literaturë pornografike.
Ndalohen kolitë që përmbajnë sende që për natyrën e tyre prishen shpejt dhe nuk iu rezistojnë kushteve të transportit. Ndalohet futja në shtypshkrime dhe cekograme e njoftimeve ose dokumentave që kanë karakterin e një korrespondence aktuale dhe personale.

Çdo shtet ka kufizimet e veta, siç mund ta lexoni në këtë link, ndaj informohuni paraprakisht për dërgesat në varësi të shtetit.