Autoritetet iraniane kanë arrestuar babain e vajzës 22-vjeçare, Mahsa Amini, e cila u kthye në simbolin e protestave të vazhdueshme dhe të dhunshme në Iran.

 
Amajd Amini, i ati i vajzës së ndjerë, u arrestua në banesën e tij ditën e djeshme dhe u dërgua në Ministrinë e Inteligjencës në Sagez, ku u mor në pyetje nga autoritetet. Sipas “Radio Free Europe” (“Radio Europa e Lirë”), familjes Amini nuk u lejohet që të largohen nga shtëpia në përvjetorin e vdekjes së vajzës së tyre.

Mësohet se shtëpia është rrethuar nga forcat e sigurisë, që bllokuan edhe rrugën për të shmangur protestat e qytetarëve pranë shtëpisë së familjes. Autoritetet iranine kanë shtrënguar masat, për të zvogëluar kështu ndikimin e protestave masive që pritet të ndodhin në mbarë vendin.

 
Në zona të ndryshme të Teheran, në kryeqytetin e Iranit, grupe të mëdha njerëzish kanë nisur protestat e mëdha, duke brohoritur slogane: “Grua, jetë, liri” dhe “Vdekje diktatorit”. Pavarësisht dhunës barbare që vijon të jetë prezente, duke burgosur qindra iraninë, qytetarët vijojnë të protestojnë kundrejt masave ekstreme dhe diktatoriale.

Mahsa Amini ndërroi jetë vitin e kaluar, pasi u rrah për vdekje teksa arrestohej nga “policia e moralit” për shkak se nuk kishte vendosur si duhet shaminë. Rrahja e saj u fsheh nga autoritetet, të cilët pretenduan se ajo ndërroi jetë për shkak të sulmit në zemër dhe ky mashtrim nxiti zemërimin dhe reagimin publik.

Ajo u dërgua në një “qendër riedukimi” dhe tre ditë më vonë vdiq në spital. Qeveria ka argumentuar se Amini vdiq nga një "sulm i papritur në zemër", por familja e saj tha se ajo nuk kishte asnjë sëmundje dhe beson se ajo u vra. Që pas rastit tronditës, nga Lindja e Mesme deri në Europë dhe Shtetet e Bashkuara, njerëzit kanë marshuar për të protestuar në shenjë solidariteti.

 
Protestat e shumta dhe masive sollën edhe burgosjen dhe ekzekutimin e shumë qytetarëve iranianë dhe sipas grupeve të të drejtave të njeriut, gjatë këtyre protestave janë vrarë deri në 500 njerëz dhe shumë të tjerë janë burgosur ose dënuar me burg për një periudhë të gjatë kohore.