25 vite pas vdekjes së saj, ikona e stilit dhe e bukurisë, princesha e ndjerë Diana vazhdon të frymëzojë përmes veshjeve, aksesorëve dhe ngjarjeve që kanë ndërtuar jetën e saj.
Nuk është rastësi që ankandet tërheqin një mori kureshtarësh dhe njerëzish entuziastë, të gatshëm që të paguajnë shuma astronomike për fituar një copëz nga historia e Diana Spencer-it. Eleganca, stili dhe karizma e saj mbeten të pagabueshme edhe sot kur kanë kaluar dekada nga vdekja e princeshës.
Një prej tyre është pulovra e leshtë e markës Warm & Wonderly që nuk kaloi pa u vënë re, e shitur në ankandin "Fashion Icons" të Sotheby's për një shumë rekord.
Kjo pulovër u vesh për herë të parë nga Diana në vitin 1981 gjatë një ndeshjeje me kuaj, kur ajo ishte vetëm 19 vjeçe, e pas pak javësh do të martohej me Princin Charles. Veçantia nuk qëndron tek materiali i pulovrës, sa tek dizanji. Një dele e zezë që spikat në mesin e deleve të tjera të bardha është një detaj kaq i veçantë.
Pulovra u ble nga Diana për 50 dollarë, ndërsa shtëpia e ankandeve e kishte vlerësuar me shifrën nga 50 mijë deri në 80 mijë dollarë, por në fund pulovra u shit për 1.1 milionë dollarë.
Si u rigjet pulovra e famshme?
Princesha e veshi disa herë pulovrën, e cila pësoi një dëmtim të vogël, por bashkëpunëtori i Dianës i kërkoi markës që ta riparonte ose ta ndërronte me një të re sepse princeshës i pëlqente shumë. Themelueset e firmës, Joanna Osborne dhe Sally Muir, vendosën t’i dërgonin një të re dhe e mbajtën të dëmtuarën në ruajtje, ku u rizbulua aksidentalisht vitin e kaluar, e palosur në një kuti me pulovra të ngjashme të vjetra.
Pulovra me delen e zezë që theu rekordin
Shitja shënon një rekord të ri. Deri më tani asnjë artikull që i përkiste princeshës nuk ishte shitur për një shumë kaq të lartë. Kjo pulovër tejkaloi dhe rekordin e mbajtur nga bluza jeshile e Kurt Cobain, e veshur në koncertin MTV Unplugged të Nirvana-s në vitin 1993, që u shit për 334,000 dollarë në vitin 2019.
Burimi: Elle
