Jimmy Fallon thuhet se i ka kërkuar falje stafit “The Tonight Show Starring Jimmy Fallon”, pasi Rolling Stone publikoi një artikull ku punonjës aktualë dhe ish-punonjës ngrinin akuza duke pretenduar për një mjedis toksik pune.

Gjatë një bisede në Zoom me stafin e "The Tonight Show" të mbajtur pas publikimit të artikullit, Fallon thuhet se ka thënë se nuk ka ndërmend të "krijojë atë lloj atmosfere”.

“Është e turpshme dhe ndihem shumë keq,” tha ai. “Më falni nëse ju turpërova ju, familjen dhe miqtë tuaj… Ndihem aq keq sa nuk mund t'jua tregoj. Unë dua që kjo shfaqje të jetë argëtuese, duhet të jetë gjithëpërfshirëse për të gjithë, duhet të jetë gallatë, duhet të jetë shfaqja më e mirë, njerëzit më të mirë."

Më herët të enjten, Rolling Stone publikoi akuza nga dy punonjës aktualë dhe 14 ish-punonjës, përfshirë ekipin e produksionit dhe skenaristët, të cilët kërkuan të mos e zbulonin identitetin nga frika e hakmarrjes.

Sipas raportit të Rolling Stone, burime të shumta pretenduan se Fallon kishte një histori "shpërthimesh" dhe sulmesh ndaj stafit kur ishte nën presion; dhe se dhomat e zhveshjes së të ftuarve njiheshin zakonisht si "dhoma për të qarë", ku punonjësit mund të largoheshin nga stresi i tyre.

“Ti nuk e dije kurrë se me cilin Jimmy kishe të bëje,” tha dikush. “Nëse Jimmy nuk ishte në humor, dita e të gjithëve ishte e keqe. Njerëzit nuk do të bënin shaka në zyrë dhe nuk do të qëndronin përreth dhe të flisnin me njëri-tjetrin.”

Përfaqësuesit e Fallon refuzuan të komentojnë për Rolling Stone. Një zëdhënës i NBC tha:

“Si në çdo vend pune, ne kemi pasur punonjës që kanë ngritur disa çështje; ato janë hetuar dhe janë ndërmarrë veprime sipas rastit. Siç ndodh gjithmonë, ne inkurajojmë punonjësit që mendojnë se kanë përjetuar ose vërejtur sjellje të papajtueshme me politikat tona, të raportojnë shqetësimet e tyre në mënyrë që ne t'i adresojmë ato në përputhje me rrethanat."