Aktori Visjan Ukcenaj tregoi me detaje për një nga momentet më të vështira në jetë, kur bashkëshortja e tij ishte shtatzënë dhe gjendja e tyre ekonomike po haste shumë vështirësi.

Në një intervistë për botimin e muajit shtator të Revista Bordo, aktori rrëfeu se “periudha më e vështirë e jetës time, sa i përket anës financiare, është viti 2018 kur ne patëm një tranzicion pasi u shkëputëm nga Vizion Plus në Tv Klan.”

“Duke qenë se ishim në pritje të djalit, sapo kishim marrë një shtëpi më të madhe dhe ajo ka qenë në kuptimin e vërtetë të fjalës periudha kur mbetëm pa ‘kokërr leku në xhep’. Bashkë me Jonën, e cila ishte shtatzënë, kërkonim nëpër xhepa pantallonash nëse ka mbetur ndonjë lekë. Ajo ka qenë vera më e vështirë në jetën time dhe e vetmja që ne nuk kemi bërë asnjë ditë plazh nga mungesa e parave. Nuk kemi dalë fare nga shtëpia për disa javë me radhë. Natyra ime sedërlie nuk më linte të kërkoja ndihmë apo hua as nga familja ime,” tha ai.

“Si me magji, kur lindi im bir në shtator, çdo gjë nisi të ndryshojë me rrogat dhe me të ardhurat tona në familje. Ardhja e Divinit në jetën tonë, përpos mbushjes shpirtërore, solli si me magji begatinë që na kishte munguar aq shumë së fundmi,” shtoi aktori.

Pas përfundimit të “Klanifornia”, Ukcenaj la të nënkuptuar gjatë një interviste për “Pushime on top” se do të jetë pjesë e programit të humorit në Top Channel, “Portokalli”.