“Shqipëria një Itali e vogël”-shkruan Financial Times! “Shqipëria, Maldivet e pazbuluara të Evropës”-lexohet në titullin e The Sun dedikuar vendit tonë, destinacioneve, çmimeve, hotelerisë, etj.
Për boom-in turistik gjatë kësaj vere kanë shkruar shumë media, vendase dhe të huaja me artikuj të dedikuar për mijëra pushues që zgjodhën Shqipërinë si destinacionin e tyre. Nga plazhet e bukura me ujëra të kaltër tek zonat e pazbuluara që janë atraksion për të huajt, mikpritja, ushqimi i shijshëm, të shumtë janë faktorët e renditur mes arsyeve se pse shumë të huaj zgjodhën Shqipërinë për të pushuar.
Por, në mesin e pushuesve të zakonshëm, janë edhe ata me statusin special që “zbarkuan” për pushime në Shqipëri me jahte personale, helikopterë ushtarakë dhe eskortë shoqëruese. Dua Lipa me familjen dhe miqtë e saj zgjodhën jugun e Shqipërisë për një super tur pushimi. Me fotot e bukura, mbrëmjet e çmendura buzë detit, videot speciale, të gjitha ishin “shija” e vërtetë e pushimeve “alla” shqiptare për artisten me famë botërore.
View this post on Instagram
Sopranoja Ermonela Jaho zgjodhi Durrësin për të pushuar dhe kënaqësinë e kësaj përvoje e ndau virtualisht përmes disa fotove dhe videove.
Kryeministrja italiane Giorgia Meloni, “zbarkoi” në vilën qeveritare në Vlorë ku e priste kryeministri Rama për disa ditë pushimi në jug të vendit. E shoqëruar nga familjarët e saj, fotot e Melonit në skaf duke lundruar në brigjet e Vlorës bënë xhiron e mediave.
Prindërit e Rita Orës u rikthyen për pushime në Shqipëri, e duket se vendi ynë është një zgjedhje e përvitshme për prindërit e artistes së njohur. Këtë herë, jo dete e plazhe, por një pushim në një agroturizëm në Lezhë.
Tony Blair, ish-kryeministri britanik, njëherësh edhe këshilltari i Ramës mbërriti në Himarë me helikopter privat dhe një eskortë shoqëruese. Disa foto qarkulluan nga pushimet e tij në Vlorë, i rrethuar nga miqtë dhe familjarët.
Mes mijëra italianëve që zgjodhën Shqipërinë për të pushuar, kishte edhe një tjetër personazh të njohur pas Melonit, siç është komediani Luca Pasquale Medici, i njohur me emrin e artit Checco Zalone, i cili shijoi disa ditë pushime në Palasë.
Biznesmeni Flavio Britarore foli për eksperiencën e tij të pushimeve në Shqipëri gjatë emisionit “Zona Bianca” në RT4. 74-vjeçari foli pa doreza për super pushimet në vendin tonë, çmimet e lira si edhe plazhet e bukura që i krahason me ato në Siçili e Pulia.
Ndoshta, deri në fund të sezonit, listës së VIP-ave të huaj i shtohen të tjerë emra!
