Doja Cat ka folur për herë të parë pasi humbi një numër të konsiderueshëm ndjekësish në Instagram, për shkak të debateve dhe përplasjeve virtuale me njerëzit në rrjetet sociale. Përmes një postimi në Instastory, Doja u shpreh:
“Të shoh gjithë këta njerëz që më bëjnë unfollow më bën të ndihem sikur kam mposhtur një bishë të madhe që më ka mbajtur poshtë për shumë gjatë. Ndihem sikur mund të rilidhem me njerëzit të cilët vërtet kanë rëndësi dhe më duan për atë që jam dhe jo për atë që isha. Ndihem e lirë”.
Në të njëjtën ditë që Doja bëri këtë reagim, u shfaq edhe në kopertinën e Harper’s Bazaar, në të intervistën e së cilës sqaroi shprehjen që shkaktoi edhe kaq shumë debat. (Dikush e pyeti Doja-n nëse i do fansat e saj dhe këngëtarja u përgjigj se jo, sepse nuk i njeh).
“Teoria ime është se nëse dikush nuk më ka takuar kurrë në jetë, atëherë, s’jam e vërtetë me ta. Kështu që, kur njerëzit ndërveprojnë me dikë që as nuk e njohin në internet, ata le të themi se e zotërojnë këtë person. Ata mendojnë se ky njeri u përket atyre në njëfarë mënyre”, tha Doja.
Më tej, shtoi:
“E kur ky person ndryshon në mënyrë drastike, merr përgjigje shokuese dhe pothuajse të pakontrolluara. Unë i pranova të gjitha këto që ndodhën. Kështu, vendosa paruket dhe i hoqa, rruajta kokën dhe vetullat. Kam të gjithë lirinë e botës”, referuar të gjitha teorive të fansave dhe njerëzve vërdallë se ajo ndryshoi look-un sepse i shiti shpirtin djallit.
Para një muaji, Instagram-i i Doja Cat ka shënuar humbjen më të madhe të ndjekësve, të cilët vendosën të bënin unfollow këngëtaren. E gjitha kjo erdhi si pasojë e një debati virtual që Doja pati me fansat e saj, të cilët i quajti “të çuditshëm” dhe “të frikshëm”.
Doja pati përplasjen e saj me njerëzit në fillim të javës, pasi shpërtheu ndaj fansave që e quanin veten “Kittenz” (kotele), nisur nga emri i artit të Doja Cat.
“Fansat e mi nuk e quajnë veten me asnjë emër. Nëse vetëquheni “kotele”, kjo do të thotë se duhet ta hiqni telefonin, të gjeni një punë dhe të ndihmoni prindërit në shtëpi”, shkroi ajo në Threads dhe menjëherë, fansat u kundërpërgjigjën duke thënë se ajo e krijoi termin vite më parë. Doja, vijoi debatin duke thënë se e sajoi emrin si një “adoleshente që pinte alkool”.
Ajo kritikoi edhe fansat që kishin llogari në emrin e saj, sidomos në atë ligjor. Emri i vërtetë e Doja Cat është Amala Ratna Zandile Dlamini dhe disa fansa të saj e kanë përdorur si emër në llogaritë e tyre në rrjete të ndryshme sociale. Këtë veprim, Doja e quajti “të frikshëm” dhe më vonë e fshiu reagimin.
Doja iu kundërpërgjigj edhe një tjetër personi që tha se pa fansat e saj, Doja do të ishte “asgjë”.
“Askush nuk të detyroi. S’e di pse je duke më folur sikur je nëna ime, k*rvë. Dukesh e çmendur”, reagoi Doja.
Njerëzit nisën të publikonin nëpër rrjetet e tyre sociale mendime mbi situatën në fjalë, duke iu referuar Doja-s si një person që i trajton keq fansat e saj, pa asnjë arsye. “Doja po tregohet e keqe me fansat e saj për fjalën “kotele”, sikur emri i saj i artit s’është Doja CAT dhe sikur s’u vesh si mace dhe nuk mjaulliu në një intervistë të plotë”, referuar intervistës së saj virale në Met Gala 2023.
Dikush tjetër, dukej pak i çuditur me reagimet e artistes dhe shkroi: "Kjo thuhet nga Doja Cat? E njëjta grua që mjaulliu në Met Gala?".
Artikuj të sugjeruar:
