Reperi nga Kosova, Feronit Shabani, i njohur si Fero, është arrestuar për dhunë në familje, raportojnë mediat në Kosovë.

Burimet e Gazetës Sinjali brenda prokurorisë kanë bërë me dije se kësaj here Fero dyshohet se ka ushtruar dhunë ndaj partneres së tij, modeles Arbenita Ismajli.

Kjo e fundit, e shqetësuar dhe në gjendje të rëndë, është larguar nga banesa ku bashkëjeton me të dyshuarin dhe vajzën e tyre dhe ka kërkuar ndihmën e Policisë së Kosovës.

Gazeta Sinjali raporton se sipas dëshmisë së Arbenitës, pas një konflikti verbal me Feron, ai ka ushtruar dhunë fizike duke e goditur me grusht. Po kështu, dyshohet ta ketë kërcënuar me jetë, duke i thënë se do e vrasë nëse ia merr vajzën.

Fero raportohet se është arrestuar dhe po hetohet me dyshimin e kryerjes së veprës penale “Dhunë në familje”.

Privé, të dielën përmes rubrikës “E vërtetë, e pavërtetë”, raportoi për një krizë serioze në raportin mes tyre.

Ata nuk e ndjekin më njëri-tjetrin në Instagram.

Fero dhe Arbenita kanë bashkë një vajzë, Ninën.