‘Overthinking’ është një nga problemeve më të hasura në marrëdhënien me veten, por edhe me personin e zemrës. Mund ta gjesh shpesh veten duke menduar për situata negative, edhe pse ato ende nuk kanë ndodhur, ose me shumë gjasa nuk do të ndodhin fare.
Shumë dilema, pikëpytje, “po sikur?” dhe mendime të pafundme që s’i ndal dot dhe papritur ti nis të veprosh sipas atyre mendimeve, duke mërzitur veten dhe të tjerët rreth teje. Por, ka disa mënyra se si ta ndalosh ‘overthinking’ dhe të qëndrosh me këmbë në tokë.
Pranoji mendimet e tua
“Pa i njohur dhe pranuar mendimet tona, nuk do të mund t’i sfidojmë ato. Ndjesitë e tua janë gjithnjë të vlefshme dhe duhet t’ia kujtosh shpesh veten këtë”, thotë seksologia Lilith Foxx, e cila këshillon që të mos i kundërshtosh mendimet që ke në një situatë të tillë.
Rikujtoji vetes se ç’po ndodh realisht
Kur mendja jote nis të mos e ndajë realitetin nga imagjinata, rikujto faktet dhe qëndro në të tashmen. Disa ekspertë sugjerojnë që të vizualizosh një shenjë “STOP” që të ndal dhe të rikthen në vendin ku je, me faktet që ke para syve.
Sfido mendimet e tua
Po sikur situata të jetë ndryshe? Sipas psikologes Elena Touroni, duhet të mendosh me veten: “Është një fakt, apo një opinion që kam rreth situatës?”. Nëse ke të bësh me fakte, qetësohu dhe mendo për mënyrën sesi mund ta zgjidhësh problemin; nëse është opinion, mendo edhe skenare pozitive. Testoje dhe sfidoje veten duke ndryshuar narrativën.
Shpërqendrohu
Sapo të rikthehesh në të tashmen, zhvendose vëmendjen diku tjetër. Nëse në lidhjen tënde je njeriu që planifikon, mundohu të planifikosh një takim romantik, apo një udhëtim, pasi e meriton! Ose në të tjera raste, shih një komedi, apo lexo një libër limonadë.
Komuniko sa më shumë!
Mungesa e komunikimit, shpeshherë është themeli i ‘overthinking’ dhe një ndër ngërçet më të shpeshta në një marrëdhënie romantike. Gjithnjë komuniko me partnerin/en, në mënyrë që të kesh një ide të qartë se ç’po ndodh dhe të mos kesh mendime aspak realiste mbi situatën.
Praktiko kujdesin ndaj vetes
Qoftë përmes kujdesit të lëkurës, meditimit, shkrimit të mendimeve, apo dëgjimit të një podkasti motivues, praktiko kujdesin ndaj vetes, mendjes dhe dëshirave të tua.
Kur është momenti që ndoshta duhet të konsiderosh konsultimin me një terapist?
Ndonjëherë, të praktikosh metodat e mësipërme ndoshta nuk është mjaftueshëm dhe të duhet një ndihmë profesionale.Kur është momenti i duhur për ta bërë këtë?
Ne të sugjerojmë këto çaste:
Kërkon aprovimin dhe validimin e partnerit/es
‘Overthinking’ po ndikon në jetën tënde të përditshme, në punë dhe në marrëdhëniet me të tjerët
Manifestohet në simptoma fizike.
Artikuj të sugjeruar:
