Unë, si një Ujor shkurti që jam, i dua shumë udhëtimet dhe përvojat e reja, ama, nuk i them kurrë “jo” luksit (ndoshta sepse kam si ashendent një Bricjap, hmm) dhe një fundjave të pakrahasueshme në Portonovi. Kështu që, paketova rrobat, produktet e kujdesit për lëkurën dhe u nisa!

 
Më parë kisha bërë ca kërkime në Google për një resort të pazakontë, të qetë dhe super luksoz, por kur mbërrita, s’ma merrte mendja se do kalonte çdo pritshmëri timen. Sapo vendosa këmbët në resort, u hasa menjëherë me buzëqeshje të çiltra të stafit. Të gjithë të sjellshëm, të këndshëm, bënin biseda interesante, të kuruar dhe simpatikë. Për mua, ky është #greenflag i parë.

 
Por, përpos shërbimit, diçka tjetër që më la shumë mbresa ishte apartamenti im. S’di si ta përshkruaj tjetër përveçse “perfekt”. I bollshëm, i rrahur nga drita e diellit, komod dhe i arreduar shumë bukur. Unë, si një njeri që vdes për detajet, hodha një sy përreth dhe po, aprovova!

Gjithçka dukej e pastër, e bukur, e përsosur. Kur them “gjithçka”, nuk e teproj aspak sepse çdo detaj ishte i mirëmenduar. Që nga shampot “Rituals” (të preferuarat e mia) e deri te rehatia që ofronte çdo dhomë, sinqerisht ju them që s’mw bëhej të dilja fare nga apartamenti.

 
Krevati, pika ime e dobët, suuuuper i rehatshëm! Edhe tani që jam rikthyer, pengu im më i madh është pikërisht fakti që s’i pyeta për markën e dyshekut. Qetësia e ofruar gjithashtu e papërsëritshme. Në Portonovi ndihesh si në shtëpi dhe pavarësisht se mund t’ju duket klishé, duhet të më besoni dhe ta përjetoni.

 
Por, pavarësisht sa tundues ishte krevati, sërish, u vesha dhe dola të shihja përreth. Pashë kudo njerëz të lumtur, të cilët merrnin rreze, shijonin pjatat super të shijshme (për to do t’ju tregoj më vonë) dhe nxirrnin shëtitje qenushët lozonjarë. Përreth sytë e mi shihnin detin, jahtet luksoze dhe dallgët që i përkundnin ato. Kështu, siç mund ta mendoni, shijova një koktej te “Romeo & Juliet”, një bar po aq romantik dhe cool sa vetë emri.

 
Shpejt kuptova se Portonovi është shumë më tepër se një destinacion, është një stil jetese, një vend që të josh të kridhesh në kaltërsinë e Adriatikut dhe pastaj, me flokët dhe trupin gjithë kripë, të shijosh kokteje fantastike.

 
Më pas, përvoja ime u bë edhe më interesante, sepse hellooo, u prezantova me ushqimin më të mirë! Unë s’jam Gordon Ramsay, por mund të them që gjatë kësaj fundjave kam ngrënë ndoshta ushqimet dhe ëmbëlsirat më të mira (mami, mos e lexo këtë). Pjata e preferuar do pyesni ju? Ishte një muhalebi me fëstëk! Pastaj sallatat e frutave...Besoj se këto janë pjatat që të servirin në parajsë.

 
Por, mos mendoni se shqisat e mia u bekuan vetëm me ëmbëlsira dhe kokteje. Më lejoni t’ju rrëfej edhe për hotelin mbresëlënës: “One&Only”! Më duhet t’ju them: Çdo emër vendndodhjeje në këtë resort ishte një goditje në shenjë. “One&Only” quhej hoteli dhe e tillë qe edhe përvoja ime. Mund t’ju them se së pari u mahnita nga arkitektura dhe ngjyrat që të dhuronin një ndjesi të ëmbël të një godine delikate, me tone neutrale, por njëkohësisht edhe idenë se po, je në një vend magjepsës dhe luksoz, i cili të fton të jetosh momentin dhe të bësh pushimet e ëndrrave.

 
Këtu u zhyta në pishinat e këndshme dhe më pas, vizitova një prej SPA-ve më të bukura që ka parë. Ju them me bindje të plotë që një “Zen-Zen-Namaste” është ajo që më duhej në jetë. Më pas, siç i ka hije, sigurisht një festë, sepse vetë Portonovi të fton të festosh! 

 
Tani m’u rikthyen të gjitha momentet e lumtura dhe e kapa veten duke buzëqeshur. Gjithsesi, mund të them se jam edhe pak e trishtuar, sepse po ju tregoj për përvojën time, ndërkohë që dua shumë ta përjetoj sërish, ose të paktën të shijoj një “Dirty Martini” te bari që më la një shije më të mirë se pija.

 
Ja pra, kaq ju uroj! Të përjetoni pushimet që kalova unë! Më besoni, do të mbeten gjatë në memorien tuaj!