Tajvan/ Tërmeti i fuqishëm shkakton viktima dhe raportohen njerëz të bllokuar
Një tërmet me magnitudë 7.4 ballë i shkallës Rihter ka goditur brigjet lindore të Tajvanit, duke shkaktuar 9 viktima dhe duke lënduar qindra të tjerë. Nga tërmeti, raportohen rreth 127 njerëz të bllokuar në godina të ndryshme.
Tërmeti, supozohet të jetë më i forti i 25 viteve të fundit, megjithatë, për një tërmet të tillë, fatmirësisht, numri i viktimave është i ulët. Administrata Qendrore e Motit në Tajvan, ka këshilluar banorët e zonës që të zhvendosen në toka më të larta, pasi mund të ketë rrezik për një cunami. “Dallgë deri në 3 metra priten së shpejti”, raportoi Agjencia Meteorologjike e Japonisë, për ishujit Miyakojima dhe Okinawa.
Vrasja e punonjësve vullnetarë/ SHBA i bën presion Izraelit
SHBA ka rritur dozën e presionit ndaj Izraelit dhe i ka kërkuar të bëjë një hetim të përshpejtuar për sulmin që u mori jetën 7 vullnetarëve që punonin në grupin e bamirësisë “Kuzhina Qendrore Botërore” në Gazë. “Izraeli duhet të marrë masa më të mira për mbrojtjen e punëtorëve të bamirësisë dhe të të gjithë civilëve”, tha zëdhënësi i DASH, Matthew Miller.
“Nuk ka rëndësi se si gabuan ata. Në fund të fundit, kanë vdekur shtatë punëtorë të bamirësisë, të cilët po përpiqeshin të dërgonin ndihma humanitare. Prandaj, pavarësisht se cila është arsyeja që e shkaktoi këtë tragjedi, apo gabimi që ndodhi brenda IDF-së (Forcave të Mbrojtjes Izraelite), është e papranueshme”, tha Miller.
Meksikë/ Vritet në mes të mitingut kandidatja për kryebashkiake
Gisela Gaytan u vra si pasojë e atentatit, ndërsa ishte duke paraqitur planin e saj të strategjisë për sigurinë në Celaya, Guanajuato. Persona të armatosur hapën zjarr drejt saj, duke e vrarë në çast. Raportohet se më parë, Gisela kishte kërkuar mbrojtje nga autoritetet meksikane, por nuk kishte marrë një përgjigje.
Një kandidat për këshillin e qytetit gjithashtu u raportua fillimisht si i qëlluar për vdekje në incident, por Ministria e Sigurisë më vonë tha se personi në fjalë ishte zhdukur. Prokurori i shtetit të Guanajuato tha se po hetonte vrasjen. Asnjë arrestim nuk është bërë bërë deri më tani lidhur me ngjarjen dhe autoritetet duket se nuk kanë ndonjë pistë.
Gaza/ Ndihmat kthehen mbrapsht, pas vdekjes së 7 vullnetarëve
Vdekja e 7 vullnetarëve në Gaza shkaktoi kthimin e ndihmave që udhëtonin në Qipro. Stafi i Kuzhinës Qendrore Botërore po shkarkonte ndihmat në maunen që lundroi nga Qipro, kur autokolona e tyre u godit nga një sulm ajror izraelit.
Pas maunes, edhe një anije ende e ngarkuar me 240 tonë ushqime, u rikthye në Qipro, pa bërë dorëzimin, pasi organizata, për çështje sigurie, pezulloi operacionet e saj të bamirësisë. “Një e treta (e ngarkesës së ndihmës) u dorëzua dhe dy të tretat po kthehen”, raporton Reuters.
