Nëna e Brian Laundrie, burri që vrau të fejuarën e tij, Gabby Petito, dhe më vonë vrau veten në vitin 2021, i shkroi djalit të saj duke thënë se do ta ndihmonte atë "të zhdukte një trup" nëse do të kishte nevojë, sipas një kopje të letrës, e cila nuk ka datë.
“Dua vetëm të kujtosh se do të të dua gjithmonë dhe e di që do të më duash gjithmonë. Ti je djali im. Asgjë nuk mund të më bëjë të resht së dashuri ty, asgjë nuk do të na ndajë ose nuk mund të na ndajë kurrë. Pavarësisht se çfarë bëjmë, apo ku shkojmë apo çfarë themi - ne gjithmonë do ta duam njëri-tjetrin," shkruante Roberta Laundrie në letrën e siguruar nga CNN.
“Nëse je në burg, do të të sjell një tortë me letër brenda,” shkruan ajo duke nënkuptuar se është e gatshme ta ndihmojë në një situatë të vështirë. “Nëse ke nevojë të zhdukësh një trup, do të shfaqem me lopatë dhe thasë mbeturinash. Nëse shkon në Hënë, do të shoh qiellin që të kthehesh.”
Roberta Laundrie ka thënë se letra ishte shkruar para udhëtimit të djalit të saj me Gabby-n, dhe një nga avokatët e saj dha një deklaratë duke thënë se letra "nuk kishte asnjë lidhje me Gabby-n", megjithëse familja e Petito-s i ka kundërshtuar këto pohime.
Në letër shkruhet edhe “digje pasi ta lexosh” dhe u gjet në çantën e shpinës së Brian Laundrie kur eshtrat e tij u gjetën në tetor 2021.
Letra citon gjithashtu një fragment nga Bibla: “Asgjë nuk mund të na ndajë; as urrejtja, as uria, as mungesa e strehimit, as kërcënimet, as mëkati, as e imagjinueshmja dhe as e paimagjinueshme nuk mund të futen mes nesh.”
Letra u gjet gati dy vjet pasi çifti i ri u nis për një udhëtim jashtë vendit, të cilin e dokumentuan në rrjete soiale. Brian u kthye në shtëpi pa Gabby-n. Eshtrat e Gabby-t u gjetën në një pyll në Wyoming dhe vdekja e saj u cilësua si vrasje përmes mbytjes. Para se të vriste veten, Brian Laundrie shkroi në fletore se ishte përgjegjës për vdekjen e saj, sipas FBI. Përdoruesit e rrjeteve sociale luajtën një rol thelbësor në zbardhjen e çështjes në fjalë.
Familja Petito argumenton se prindërit e Brian-it dhe avokati i tyre e dinin vendndodhjen e eshtrave të Gabby-t dhe kanë fshehur vrasjen e të birit.
Gjykata ende po heton për datën e shkrimit të letrës.
