Dje bota u shokua dhe u trishtua nga lajmi se këngëtarja e famshme, Tina Turner ndërroi jetë në moshën 83-vjeçare, duke lënë pas këngë ikonike dhe një gjurmë të pashlyer në muzikën Rock & Roll.

Por, ndonëse Tina i këndoi lirisë dhe këngët e saj na sjellin përherë në humor të mirë, sërish, jeta e saj ishte e mbushur me sfida dhe vështirësi.

Tina ishte një grua e dhunuar nga ish-bashkëshorti, Ike Turner. Ndonëse lidhja e tyre, nga jashtë dukej perfekte, në realitet, ishte e mbushur me dhunë fizike. Për vite të tëra, Tina ishte viktimë e dhunës dhe për këtë foli hapur në një intervistë në vitin 2018.

“(Në lidhjen tonë) ka pasur dhunë, sepse ai kishte frikë se do e lija”, tha Tina.

Ajo dhe Ike u divorcuan në vitin 1978.

Probleme shëndetësore

Tina gjithashtu pati momente mjaft të vështira, të cilat lidhen me shëndetin. Ajo vuajti për vite me radhë nga PTSD, pati probleme me veshkat, presion të lartë të gjakut dhe kancer në zorrë.

Në tetor të vitit 2013, ajo pësoi edhe një goditje në tru dhe përvojën e tregoi në librin e saj, “My Love Story”. “U zgjova dhe papritur isha në panik. Një vetëtimë më goditi në kokë dhe në këmbën e djathtë – të paktën kështu m’u duk – dhe pata një ndjesi të çuditshme në gojë, që ma bëri të vështirë t’i thërrisja Erwin (bashkëshortin) për ndihmë. Dyshova se s’ishte diçka e mirë, por ishte edhe më e keqe se ç’mendoja. Po pësoja goditje në tru”, shkroi ajo.

Pasi qëndroi për 10 ditë në spital, Tina rifitoi aftësinë për të ecur, duke theksuar se rehabilitimi s’qe fare i lehtë.

Vetëvrasja e djalit të madh

Në vitin 2018, djali i Tina Turner, Raymond Craig, kreu vetëvrasje në Los Angeles. Në atë periudhë, këngëtarja u shpreh: “Momenti më i trishtuar si nënë. Ai ishte 59 vjeç dhe vdiq tragjikisht, por do të mbetet vogëlushi im, gjithmonë”.

Vdekja e djalit të vogël

Në vitin 2022, Tina përjetoi një tjetër humbje: Atë të djalit të vogël, Ronnie, i cili vdiq nga kanceri.

Artikuj të sugjeruar: