Vesa Luma dhe krijimtaria e saj i kanë munguar muzikës shqiptare, pasi prej vitesh, ajo jeton në Zelandën e Re, së bashku me bashkëshortin e saj, Geraldin, i njohur si Big Basta dhe djalin e tyre, Liamin.
Por, Mira Kazhani, e ka sjellë në podkastin e saj, në një rrëfim të veçantë, ku Vesa tregoi ndër të tjera edhe të mirat dhe të këqijat që i ka sjellë jetesa në Zelandën e Re.
Së pari, ajo rrëfeu se vendimi për të jetuar në Zelandën e Re, erdhi natyrshëm, pasi ata kanë jetuar më parë në Australi dhe janë mrekulluar nga ai vend. Vesa theksoi se ajo dhe partneri, e kanë parë gjithnjë veten si “banorë të botës” dhe s’i janë frikësuar përvojave të reja. Një tjetër arsye ishte edhe lindja e Liamit dhe vendimi i përbashkët i prindërve për t’i ofruar një fëmijëri më të qetë dhe një të ardhme më të mirë.
Megjithëse, Vesa tha se i pari që dha mendimin ishte Geraldi dhe Vesa vendosi ta ndiqte dhe se nuk e thotë me siguri nëse do të jetojë përgjithmonë në Zelandën e Re, pasi gjithnjë rend pas kujtimeve.
Këngëtarja tha se jo gjithçka është aq e bukur dhe perfekte sa në rrjetet sociale.
“E kemi sfiduar veten dhe ka qenë gjithçka shumë e vështirë, jo siç e kemi postuar në rrjetet sociale, sepse unë kam qejf të shpërndaj poztivitet dhe jo gjëra që mbase mund ta ngarkojë dikë. Nuk ka qenë gjithnjë aq bukur sa vendet që unë shpeshherë postoj”.
Ajo theksoi se vendi është përrallor dhe njerëzit shumë mikpritës, por sërish, në disa momente i ka munguar prezenca e njerëzve të afërt:
“Në fillim ishte shumë e bukur dhe më shijonte pa fund, por gënjej nëse them që më ka shijuar gjithë kohës, pasi kishte momente kur kishim nevojë për fjalën e mirë dhe njeriut që gjendet aty, në rastet kur sëmurej djali. Por, kjo na ka forcuar shumë”.
Vesa tha edhe se ka bërë disa projekte muzikore, të cilat “i ka hedhur në plehra” sepse s’ka qenë shumë në frymëzimin dhe humorin e duhur.
“Nuk kam qenë në një moment që doja atë që bëja. Kam shkruar dhe shkruaj muzikë vazhdimisht, për veten, por isha në një moment jo shumë të mirë emocional. S’kam pasur fare frymëzim. Për herë të parë në jetë, nuk e gjeje frymëzimin dhe kjo ka ndodhur në vitin e pandemisë dhe këtë vitin e fundit”, saktësoi ajo, duke shtuar se as muzikë nuk ka dëgjuar.
Këngëtarja u shpreh se edhe pse Zelanda e Re është shumë e bukur dhe e qetë, sërish nuk mund të gjente frymëzimin që i duhej për të sjellë një projekt muzikor.
Në një moment, ajo tha se ndosha ka kaluar një periudhë depresive dhe foli hapur për periudhat e ankthit.
"Ndoshta ishte një depresion i vogël, por kam patur ndihmën e nanës dhe të motrës (të dyja psikologe). Ngadalë, ndihem që jam më e fortë".
Vesa tregoi se ka pësuar disa tronditje, që nga lufta në Kosovë, traumat e pas-luftës, vdekja e të atit, fama në Tiranë, jetesa në një vend totalisht të ri, mosprania e dikujt që mund ta ndihmonte me djalin, të gjitha bashkë ndikuan në përjetimin e një periudhe të vështirë.
Ajo kujtoi një moment kur "u ngujua" së bashku me djalin në një hotel në Zelandën e Re, pasi u karantinuan sepse u infektuan me Covid-19. Më pas, ata u ndanë, për shkak të protokollit që ky shtet aplikoi. Vesa tha se kjo kohë iu duk edhe më e vështirë se lufta.
Vesa gjithashtu theksoi se edhe pse Zelanda e Re është ndër vendet më të bukura që ka parë, me njerëzit më të mirë që ka takuar, por sërish Kosova dhe Shqipëria zë një vend shumë të rëndësishëm në zemrën e saj.
