Sapo prindërit zbulojnë se së shpejti do të vijë një fëmijë në jetët e tyre, nxitojnë të blejnë gjëra nga më të ndryshmet, shpesh jo fort të zgjuara. Nisur nga përvoja e shumë prindërve, në vijim do të gjeni një listë me produkte, te të cilat e mira është të mos shpenzoni. Arsyeja? Nuk ju duhen për shumë gjatë ose s’ju duhen fare!
Rroba, rroba, rroba
Po jua themi sërish: bebet rriten aq shpejt sa rrobat me të cilat do ta nxirrni të voglin/ën tuaj nga spitali, pas 3 javësh nuk do t’i bëjnë më. Për këtë arsye, mos shpenzoni pafund para në veshje që për pak ditë nuk do të kenë më asnjë funksion.
Dorashka kundër gërvishtjes së bebes me thonj
Me shumë mundësi, si prindër të rinj që jeni, keni në plan të blini një mal me dorashka, në mënyrë që fëmija juaj të mos lëndojë veten me thonj. E vërteta është se foshnja i përdor duart për të qetësuar veten, njësoj siç ka vepruar në barkun e nënës. Nëse ju ia bllokoni duart, do të shkaktoni nervozizëm dhe të qara. Në vend të kësaj blini një limë thonjsh për bebe.
Detergjentë për bebe
Si ia bënin nënat kur nuk kishte një detergjent specifik për të porsalindurit? Pavarësisht se shumë prindër i blejnë nga frika se larësit e zakonshëm mund të irritojnë lëkurën e fëmijës (jo, nuk ndodh) shumë gra deklarojnë se detergjentët në fjalë nuk janë fort ndihmues kur vjen puna te heqja e njollave apo papastërtive.
Batanijet e vockla dhe mini-peshqirët
Përse nuk duhet të investoni në disa të tilla? Sepse do të përdoren për fare pak kohë! E njëjta gjë vlen edhe për mini- peshqirët
Pajisjet për ushqimin e bebeve në fakt janë thjesht blendera
Përse duhet të shpenzoni sërish para kur blenderi që keni përdorur prej kaq kohësh e kryen punën më së miri. Rezultati është i njëjtë!
Termometër dushi
Nuk ju duhet një i tillë për të kontrolluar ujin me të cilin do të lani foshnjën.
Ngrohës pelenash
Fëmijës suaj nuk i intereson nëse pelena është e ngrohtë, shumë e ngrohtë apo normale. Mos u shqetësoni më shumë seç duhet.
Çizme/ këpucë
Gjatë kësaj periudhe, prindërve u rekomandohet që foshnjet t’i mbajnë me çorape veshur pasi i vogli/ e vogla ndihet më rehat dhe nuk do t’ju duhet t’ia vishni çdo 2-3 minuta, ndryshe nga këpucët që hiqen fare lehtë.
Burimi: BabyCenter
