Foto: @gerhard_pregapuca_photo

Efi Dhedhes u shpreh se është “krenare dhe e lumtur” për rrugëtimin e saj në “Big Brother VIP”. Në një postim në Instagram, ajo falenderoi publikun, produksionin dhe vlerësoi edhe finalistët e tjerë.

“Krenare dhe e lumtur! Ju kam lodhur me postimet e mia, por jam shumë e emocionuar teksa reflektoj për rrugëtimin tim në shtëpinë e “Big Brother VIP”. Vendi i tretë është një arritje e madhe për mua dhe nuk do ta kisha bërë pa mbështetjen e të gjithëve ju. Gjatë gjithë qëndrimit në shtëpi, unë u përpoqa t'i qëndroja besnike vlerave të mia, edhe në momentet më të vështira.” – shkroi ajo fillimisht.

Në vijim, Efi theksoi se “nuk ishte një udhëtim i lehtë, por mbështetja dhe dashuria juaj më shtynë që të qëndroja deri në fund në shtëpi.” Ajo vlerësoi Kiara Titon dhe Luiz Ejllin, si edhe finalistët e tjerë, Deamishel Hoxha dhe Krist Aliaj.

“’Big Brother VIP 2’ i përket Luizit dhe Kiarës. Kanë dhuruar emocione pafund dhe i uroj jetë sa më të lumtur bashkë! Krist, jam e bindur që do të shohim shumë gjëra të bukura nga ti në të ardhmen! Deamishel, je një shembull për shumë vajza! Faleminderit për çiltërsinë dhe shoqërinë që më ke dhënë gjatë disa momenteve të vështira në shtëpi.”

Efi Dhedhes ishte finalistja e dytë që u eliminua nga gara për të fituar çmimin e madh të “Big Brother VIP”. Ajo u bë pjesë e shtëpisë së BBVA që prej fillimit, më 24 dhjetor. Më pas u eleminua, si pasojë e nominimit të Deas, e cila vendosi në televotim Kiarën, Luizin dhe Efin. Javë më parë, Efi u bë sërish pjesë e shtëpisë, së bashku me Kiarën, Ronaldon dhe Bledi Manen.