Gjykata arrin në përfundimin se Donald Trump ka abuzuar seksualisht me shkrimtaren E Jean Carroll
Një gjykatë në New York njoftoi të martën se Donald Trump abuzoi seksualisht me shkrimtaren E Jean Carroll në dhomën e zhveshjes së një dyqani në New York, 27 vjet më parë.
Vendimi, për herë të parë, e cilëson ligjërisht një ish-president të SHBA-së si një “grabitqar seksual”. Por duke qenë se është rezultat i një çështjeje civile dhe jo penale, i vetmi sanksion ligjor me të cilin Trump do të përballet është ai financiar.
Një grabitqar (predator) seksual është një individ që shfrytëzon seksualisht dikë në një mënyrë abuzive ose dominuese. Ky ngacmim ose sjellje e papërshtatshme seksuale mund të mos lidhet drejtpërdrejt me seksin për ta, por është një mënyrë për të ushtruar kontroll mbi të tjerët.
Gjykata tha se Trump e nënshtroi Carroll-in ndaj kontaktit seksual pa pëlqim me anë të përdorimit të forcës me qëllim kënaqësinë seksuale. Ajo do të marrë rreth 5 milionë dollarë dëmshpërblim: rreth 2 milionë dollarë për akuzën e abuzimit seksual dhe afër 3 milionë dollarë për shpifje, për etiketimin e saj si gënjeshtare.
Zgjedhjet në Turqi: Ka gjasa që Erdogan të humbasë
Presidenti i Turqisë, Recep Tayyip Erdogan dhe partia e tij AKP do të përballen me sfidën e tyre më të madhe politike në zgjedhjet e së dielës, pasi sondazhet sugjerojnë se një opozitë e bashkuar mund t'i japë fund dy dekadave të tij në pushtet.
Erdogan ka mbrojtur vlerat shoqërore fetare dhe konservatore në vend, duke vendosur një regjim gjithnjë e më autoritar që është gjithnjë e më pak tolerant ndaj kritikave. Jashtë vendit, ai ka rritur ndikimin e Turqisë në rajon dhe ka rivendosur lidhjet e saj me perëndimin.
Kundërshtari i tij kryesor është Kemal Kilicdaroglu i Partisë Laike Republikane Popullore (CHP), i cili është zotuar të ndryshojë shumë nga politikat e Erdoganit, duke përfshirë presidencën e tij të plotfuqishme ekzekutive.
Aktivistët i bëjnë thirrje mbretit të bëjë më shumë për të pranuar rolin e Mbretërisë së Bashkuar në lidhje me skllavërinë
Mbretit Charles III i është kërkuar të bëjë më shumë për të pranuar rolin që Mbretëria e Bashkuar ka pasur në skllavërinë transatlantike, edhe pse ai u vlerësua për faktin që injoroi këshillat e Boris Johnson për të shmangur me çdo kusht këtë çështje.
Akademikët dhe aktivistët i kërkuan Charles të miratojë masa specifike për të ndihmuar në hulumtimin e lidhjeve të Mbretërisë së Bashkuar me tregtinë e njerëzve si skllevër.
Itali: Aktivistët për të drejtat e kafshëve thonë se ariu që vrau një njeri është i pafajshëm
Aktivistët e të drejtave të kafshëve po bëjnë thirrje për lirimin e menjëhershëm të një ariu femër të kapur për faktin se vrau një 26-vjeçar në veri të Italisë, pasi ata pretenduan se testet treguan se në të vërtetë, ariu ishte mashkull.
Dyshohet se ariu vrau Andrea Papi-n, 26 vjeç, i cili u plagos për vdekje teksa vraponte përgjatë një shtegu malor afër fshatit Caldes në Trentino më 5 prill.
Raportet zbuluan gjithashtu se natyra e sulmit ishte "një përpjekje e ariut për të distancuar viktimën" dhe jo "një sulm i qëllimshëm ose grabitqar".
Zbulohen mikrobe që mund të tresin plastikën në temperatura të ulëta
Mikrobet që mund të tresin plastikën në temperatura të ulëta janë zbuluar nga shkencëtarët në Alpe dhe Arktik, të cilat mund të jenë një mjet i vlefshëm për riciklimin.
Shumë mikroorganizma që mund ta bëjnë këtë janë zbuluar tashmë, por ato zakonisht mund të punojnë vetëm në temperatura mbi 30 gradë Celcius. Kjo do të thotë se përdorimi i tyre në praktikën industriale është jashtëzakonisht i shtrenjtë.
Shkencëtarët nga Instituti Federal Zviceran WSL kanë gjetur mikrobe që mund ta bëjnë këtë proces në 15 gradë Celcius. Gjetjet e tyre janë publikuar në revistën Frontiers in Microbiology.
