Aksionarët e Adidas kanë ngritur një padi në grup kundër Adidas, duke pretenduar se kompania ishte në dijeni të sjelljeve problematike të Kanye West shumë vite përpara se të përfundonte bashkëpunimi i tyre.
Ata pretendojnë gjithashtu se Adidas nuk arriti të zbusë humbjet financiare ose të marrë masa paraprake për të minimizuar dëmin, i cili erdhi si pasojë e ndërprerjes së bashkëpunimit të Adidas me markën Yeezy të Kanye West.
"Ne i hedhim poshtë këto pretendime të pabaza," tha Adidas në një deklaratë duke iu përgjigjur padisë dhe shtoi se kompania "do të marrë të gjitha masat e nevojshme për t'u mbrojtur fuqishëm kundër tyre".
Nën markën Yeezy, Kanye West krijoi veshje sportive dhe atlete që ishin jashtëzakonisht të suksesshme për Adidas. Por gjigandi i veshjeve sportive i dha fund bashkëpunimit tetorin e kaluar pasi reperi lavdëroi Adolf Hitlerin dhe nazistët në një intervistë si edhe bëri komente fyese për hebrenjtë.
Adidas ka zbuluar se mund të humbasë deri në 1.2 miliardë euro nga produktet e pashitura Yeezy nëse vendos të mos i shesë ato.
Në padi pretendohet se Adidas ishte në dijeni për sjelljen e Kanye West më parë. Kur reperi tha në një intervistë në vitin 2018 se skllavëria "tingëllon si një zgjedhje", ish-drejtori ekzekutiv Kasper Rorsted tha se, "Ka qartazi disa komente që nuk i mbështesim. Kanye ka qenë dhe është një pjesë shumë e rëndësishme e strategjisë sonë dhe ka qenë një krijues fantastik.”
Pas këtij komenti, padia pretendon se Adidas "injoroi rreziqet e mbifurnizimit të atleteve të markës Yeezy në rast se partneriteti do të përfundonte papritmas, dhe në veçanti, nëse kërkesa për këpucë do të binte për shkak të ndonjë polemike për Kanye-n.”
Padia kolektive mbulon këdo që bleu aksione midis 3 majit 2018 – ditën kur West bëri komentin për skllavërinë – deri në vitin 2023.
- Kanye West humb llogarinë në Twitter pas postimeve për nazistët dhe Hitlerin
- Kanye West për skandalin e Balenciaga-s: ‘Të gjithë të famshmit janë të kontrolluar’
- Kanye West thotë se do të kandidojë sërish për president në zgjedhjet e vitit 2024
- Së shpejti mund të blini Adidas, Gap dhe Balenciaga për vetëm $20, falë Kanye West