Netflix me sa duket është detyruar të çaktivizojë komentet në trailerin e ri të "Queen Cleopara" pas reagimeve të mëdha në internet.
Ky dokumentar me seri do të flasë për faraonin e fundit të Egjiptit, Kleopatrën, e cila lufton për të mbrojtur fronin, familjen dhe trashëgiminë e saj.
Në seri do të shfaqen një sërë intervistash me ekspertë që do ndajnë këndvështrime krejtësisht të reja për sundimtaren e fundit aktive të dinastisë Ptolemaike.
Me aktorë si Adele James, Craig Russell dhe Jada Pinkett Smith, Netflix informon audiencën se dokumenti do të eksplorojë "jetët e mbretëreshave të shquara dhe ikonike afrikane".
"Ky sezon do të shfaqë Kleopatrën, gruan më të famshme, më të fuqishme dhe të keqkuptuar në botë", thuhet gjatë përshkrimit të “Queen Cleopatra”.
Duke e quajtur figurën historike një "mbretëreshë të guximshme", platforma thekson se "bukuria dhe romancat e saj lanë në hije asetin më të rëndësishëm që ajo kishte: intelektin.
“Trashëgimia e Kleopatrës ka qenë objekt i shumë debateve akademike, të cilat shpesh janë injoruar nga Hollywood-i. Këto seri do ta rivlerësojnë këtë pjesë magjepsëse të historisë së saj.”
Dhe duket se pikërisht këtu qëndron polemika.
Traileri, i publikuar për herë të parë javën e kaluar (12 prill), tashmë ka më shumë se 1.9 milionë shikime në YouTube.
Në skenat e rishfaqjes, autorët kanë vendosur ta përshkruajnë mbretëreshë Kleopatrën si një grua me ngjyrë, gjë që ka bërë që shumë njerëz në mediat sociale të kritikojnë Netflix për shndërrimin e kësaj figure historike.
Kleopatra, bazuar në histori, ka një origjine greko-maqedonave. Të dhënat e zakonshme historike tregojnë se familja e saj greke maqedonase, dinastia Ptolemaike, kishte sunduar mbi Mbretërinë Ptolemaike të Egjiptit për më shumë se tre shekuj.
"Pavarësisht se nuk ishte etnikisht egjiptiane," konfirmon History.com, "Kleopatra përqafoi shumë nga zakonet e lashta të vendit të saj dhe ishte anëtarja e parë e linjës Ptolemaike që mësoi gjuhën egjiptiane."
Traileri ka shkaktuar një stuhi në internet dhe madje ka rezultuar në një peticion të Change.org që kërkon anulimin e dokumentarit sepse “po falsifikohet historia”.
Mbi 85,000 njerëz nga e gjithë bota nënshkruan peticionin online në vetëm dy ditë, megjithatë, që atëherë ai është hequr nga platforma.
Aty thuhej:
"Kleopatra lindi në Aleksandri, Egjipt në dinastinë Ptolemeike me origjinë greke. Ajo NUK ishte zezake. Kjo nuk është në asnjë mënyrë kundër popullit me ngjyrë, është thjesht një thirrje zgjimi për të ruajtur historinë dhe integritetin e egjiptianëve dhe grekëve.”
Reagimi nuk u ndal me kaq. Edhe në Twitter, njerëzit kanë kritikuar po njësoj.
“Netflix dhe Jada Pinkett Smith (producentja) po promovojnë një dokumentar për Mbretëreshën Kleopatra, krejt gabim. Ajo ishte greke."
“Queen Cleopatra” do të publikohet në datën 10 maj në Netflix.
