Popullsia e Japonisë ka rënë për të 12-in vit radhazi, pasi vdekjet rriten dhe niveli i lindjeve vazhdon të ulet, sipas të dhënave të qeverisë të publikuara të mërkurën, 12 prill.
Popullsia ishte 124.49 milionë në vitin 2022 – që përfaqëson një rënie prej 556,000 nga viti i kaluar.
Kjo shifër përfaqëson si ndryshimin natyror në popullsi - që do të thotë vdekje dhe lindje – ashtu edhe fluksin e njerëzve që hyjnë dhe dalin nga vendi.
Ndryshimi natyror vitin e kaluar ishte më i madhi i shënuar ndonjëherë, me një rënie prej 731,000 – i zbutur nga fluksi i njerëzve që hynë në Japoni, i cili siguroi një rritje prej 175,000, tha Sekretari Kryesor i Kabinetit, Hirokazu Matsuno në një konferencë shtypi të mërkurën.
“Është thelbësore të merren masa të forta për të trajtuar rënien e nivelit të lindjeve, i cili është një faktor kryesor në rënien e popullsisë, si një nga çështjet me prioritet të lartë për t'u trajtuar,” tha Matsuno.
Japonia ka një nga nivelet më të ulëta të lindjeve në botë, si dhe një nga jetëgjatësitë më të larta; në vitin 2020, gati një në 1,500 njerëz në Japoni ishte 100 vjeç ose më i vjetër, sipas të dhënave të qeverisë.
Kjo do të thotë se ka një rritje të popullsisë së moshuar dhe tkurrje të fuqisë punëtore - duke paraqitur një krizë demografike me dekada në zhvillim.
Një fshat në Japoninë qendrore regjistroi vetëm një fëmijë të porsalindur në 25 vjet - një lindje që u cilësua si një mrekulli për banorët e moshuar të qytetit.
Situata është aq e rëndë sa kryeministri i Japonisë Fumio Kishida paralajmëroi ligjvënësit në janar se vendi është "në prag të pamundësisë për të mbajtur funksionet sociale" për shkak të rënies së lindshmërisë.
Ai shtoi se mbështetja për rritjen e fëmijëve ishte "politika më e rëndësishme" e qeverisë dhe zgjidhja e këtij problemi "thjesht nuk mund të presë më".
Në prill, Japonia lançoi Agjencinë e saj të re për Fëmijët dhe Familjet, e cila fokusohet në masat për të mbështetur prindërit, si krijimi i më shumë qendrave të kujdesit ditor dhe ofron shërbime për të rinjtë, si këshillimi.
Nismat e mëparshme të ngjashme, të kryera shpesh nga autoritetet lokale, deri më tani nuk kanë arritur t'i ndryshojnë gjërat.
Stili i jetesës urbane, kostot e rritura të jetesës dhe orët e gjata të punës u lënë pak kohë japonezëve për të krijuar familje.
Në vitin 2022, Japonia u rendit si një nga vendet më të shtrenjta në botë për të rritur një fëmijë, sipas hulumtimit nga institucioni financiar Jefferies.
Burimi: CNN
