Putin shpall triumfin, pasi fiton me rezultat të thellë zgjedhjet në Rusi

Presidenti i Rusisë, Vladimir Putin ka marrë një tjetër mandat dhe ka shpallur fitoren e tij, ndërsa protestues të shumtë kanë dalë nëpër rrugë ndërkohë që zhvilloheshin zgjedhjet. Putin, gjatë fjalimit të tij, tha se krimet e protestuesve do të dënoheshin, por gjithashtu shtoi se rusët treguan se kanë besim dhe shpresë tek ai.

Zgjedhjet në Rusi pretendohet se janë të lira, por në fakt, nuk kishte ndonjë kandidat të vërtetë kundër Putinit. Të gjithëve atyre që mund të përmbysnin rezultatin, nuk iu pranua kandidatura nga Kremlini.

Trupat izraelite bastisin spitalin e madh në Gaza

Forcat izraelite kanë nisur një operacion të ri që përkon me bastisjen e spitalit të madh “al-Shifa” në Gaza. Në një deklaratë të publikuar në Telegram, frocat izraelite shpreheshin se në spital ka prani të terroristëve të Hamasit dhe se po përdoret nga grupimi struktura e ndërlikuar e spitalit për t’u fshehur.

“Gjatë aktivitetit, terroristët hapën zjarr ndaj trupave nga brenda spitalit. Trupat u përgjigjën me zjarr të drejtpërdrejtë dhe u identifikuan të shtënat. Trupat tona po vazhdojnë të operojnë në zonën e spitalit”, u shprehën ata, ndërsa ministria palestineze e Shëndetësisë theksoi se kjo është një shkelje e hapur e ligjit.

Do të nisin bisedimet e reja për armëpushim mes Izraelit dhe Hamasit

Një raund i katërt bisedimesh do të nisë në Katar mes Izraelit dhe Hamasit, për një armëpushim të mundshëm në Gaza. Këto bisedime do të shënojnë edhe herën e parë kur zyrtarë të Hamasit dhe ata të Izraelit do të ulen në një tavolinë të përbashkët, që nga fillimi i muajit të shenjtë të Ramazanit.

Pavarësisht se shtetet e tjera shpresonin për një armëpushim 6-javor të luftës para Ramazanit, sërish Hamasi dhe Izraeli nuk dakordësuan.

Një prej rajoneve të Gjeorgjisë mund t’i bashkohet Rusisë

Osetia Jugore, rajon i Gjeorgjisë, i cili vetëcilësohet si “shtet i pavarur”, ka hyrë në bisedime me zyrtarë rusë për t’u bashkuar me Rusinë. Në vitin 2008, Rusia e njohu Osetinë Jugore si një shtet të pavarur dhe trupat rusë nuk e lejuan Gjeorgjinë që të rimarrë kontrollin e territorit në një luftë që zgjati 5 ditë.

Lideri i Osetisë Jugore, i mbështetur nga Rusia, Alan Gagloev, tha vitin e kaluar se shpreson se ky rajon mund të bëhet pjesë e Rusisë edhe zyrtarisht. Osetia Jugore u shkëput nga Gjeorgjia pas një lufte më 1991-1992, në të cilën ndërruan jetë mijëra njerëz dhe mban lidhje të ngushta me rajonin rus, Osetian Veriore.