Në një intervistë për podkastin “Zë me Mirën” me Mira Kazhanin, Elsa Lila rrëfeu për raportin që ka sot me ish-partnerin, Alessandro-n, me të cilin ka një vajzë, Evitën.
Elsa tregoi ndër të tjera se nuk është në një lidhje dhe foli hapur për qasjen e saj mbi dashurinë.
Një pjesë nga intervista:
Mira Kazhani: Babai i Evitës ku është? Vazhdon jetën e tij prej zhytësi? Nuk jeton në Itali?
Elsa Lila: Babai i Evitës, Alessandro, jeton në Madagaskar, në Afrikë atje ku ne u njohëm. Ai vazhdon jeton në Madagaskar, nuk është më zhytës sepse tani ai është 51 vjeç. Kemi 10 vite diferencë dhe mosha nuk e lejon më që të bëjë atë profesion, i cili ka të bëjë me fizikun dhe tani ai punon në ambientin e hotelerisë. Është drejtor hoteli në një prej hoteleve të ishullit “Nosy Be” në Madagaskar.
Mira Kazhani: Keni mbetur shokë?
Elsa Lila: Po.
Mira Kazhani: Keni komunikim të mirë?
Elsa Lila: Po, kemi mbetur shumë shokë dhe besoj që distanca ka ndihmuar në të qenit shokë. Distanca i sheshon shumë gjëra, shumë mllefe. Shumë emocione negative! Ai sapo ka qenë në Romë tani, sepse në datën 8 mars ishte ditëlindja e Evitës, mbushi 12 vjeç. Kështu që papa Alessandro erdhi nga Madagaskari si çdo vit për të festuar ditëlindjen e Evitës, të gjithë së bashku dhe kur vjen, qëndron në shtëpinë tonë si një familje normale.
Mira Kazhani: Po kështu duhet të ndodhë!
Elsa Lila: Natyrisht jo në të njëjtin krevat, në dhoma të ndryshme! (qesh)
Mira Kazhani: Po mirë, nuk i dihet asnjëherë mund të rikthehet dashuria. Beson në dashuritë që rikthehen?
Elsa Lila: Jo!
Mira Kazhani: Nuk beson!
Elsa Lila: Jo, absolutisht jo!
Mira Kazhani: A ke një shok ti tani?
Elsa Lila: Jo! Nuk kam një shok!
Mira Kazhani: Po pse e thua kështu me gëzim? (qesh)
Elsa Lila: Jo nuk po e them me gëzim, po e them kështu natyrshëm. Jo, nuk kam në këtë moment. Jam vetëm dhe jam shumë mirë vetëm.
Mira Kazhani: A do e kërkoje?
Elsa Lila: Nuk do ta kërkoja sepse dashuria nuk kërkohet, ndodh. Thjesht ndodh, kur e kërkon gabon.
