BBC i ka kërkuar stafit që të fshijë aplikacionin kinez TikTok nga celularët e korporatës.
“Ne nuk rekomandojmë instalimin e TikTok në një pajisje korporative të BBC-së përveçse për arsye biznesi. Nëse nuk ju nevojitet TikTok për arsye biznesi, TikTok duhet të fshihet,” njoftoi BBC.
Vendimi i ri erdhi pasi qeveria e Mbretërisë së Bashkuar ndaloi përdorimin e aplikacionit në telefonat e dhënë nga qeveria për shkak të frikës se të dhënat mund të aksesohen nga qeveria kineze.
BBC u kërkoi punonjësve që kanë TikTok në telefonat e tyre personalë, por që i përdorin ato pajisje edhe për arsye pune, të kontaktojnë ekipin e sigurisë së informacionit.
Korporata tha se përdorimi i TikTok në pajisjet - të cilat janë blerë dhe paguar nga BBC – lejohet ende për qëllime editoriale dhe marketingu, por situata do të vazhdojë të monitorohet.
Një zëdhënës i ambasadës kineze në Britani akuzoi qeverinë se po vepronte “duke u bazuar në arsye politike dhe jo fakte.”
