Mijëra punonjës në Meta dhe Google bëjnë ‘punë false’ ose thënë ndryshe, nuk bëjnë asgjë dhe paguhen kot nga kompanitë respektive, thotë Keith Rabois, investitor, specialist në fushën e teknologjisë, si dhe shefi ekzekutiv i “OpenStore”, kompani që financon tregtarët që shesin në Shopify, partner i përgjithshëm në firmën e kapitalit sipërmarrës Founders Fund, i cili njihet gjithashtu si një nga "Mafiat e PayPal", pasi ka punuar në firmën e pagesave në fillim të viteve 2000.
Rabois tha se kompanitë e mëdha të teknologjisë janë përgjegjëse për punësimin e tepërt dhe se tanimë, do të duhet një reduktim masiv i vendeve të punës, për të ulur kostot në këtë sektor. Megjithatë, Rabois thotë se është një proces i vonuar.
Ai u shpreh se shefët ekzekutivë të Google dhe Meta kanë në kompanitë e tyre punonjës që nuk bëjnë asgjë dhe se puna e tyre është e rreme dhe praktikisht, thjesht shkojnë nëpër takime dhe mbledhje.
Sipas tij, Google ka punësuar qëllimisht inxhinierë të talentuar, për t’i ndaluar ata të shkojnë në kompani konkurrente dhe kjo strategji është mjaft “koherente” në treg. “Kjo do të thotë që inxhinierët ishin të lumtur teksa uleshin në tavolinat e tyre dhe nuk bënin asgjë”, tha Keith.
Komentet e tij vijnë si pasojë e rritjes së normave të interesit dhe inflacionit dhe muajt e fundit, këta faktorë kanë bërë të mundur që industritë të shkurtojnë staf, për të përballuar kostot e larta. Në vitin 2022, më shumë se 1,000 kompani pushuan nga puna rreth 160,000 punonjës.
Këto humbje të vendit të punës në sektorin e teknologjisë shënojnë tkurrjen e parë, pas një dekade rritjeje në këtë industri.
Nga ana tjetër, Rabois vlerësoi nismën e Elon Musk, i cili shkurtoi pothuajse gjysmën e punonjësve pasi mori në dorë udhëheqjen e Twitter-it. “Ai po jep një shembull të qartë”, tha Rabois, ndonëse jo të gjithë janë dakord me vendimin e Musk.
