Elizabeth Holmes ka sjellë në jetë fëmijën e dytë, zbuluan avokatët e saj në një dosje gjyqësore që kërkon të shtyjë fillimin e dënimit me më shumë se 11 vjet burg.
Fëmijët ishin dy nga lidhjet e ngushta familjare të përmendura nga avokatët e Holmes si arsye pse ajo nuk përbën rrezik që të arratiset dhe duhet të lejohet të qëndrojë e lirë ndërkohë që apelon dënimin e saj.
Të dy fëmijët e Holmes erdhën në jetë pasi ajo u padit për mashtrim. Në nëntor 2022, themeluesja e Theranos u dënua me mbi 11 vjet burg për mashtrimin e investitorëve në startup-in e saj të testimit të gjakut, i cili dikur vlerësohej në 9 miliardë dollarë. Ish-ylli i Silicon Valley pretendoi se teknologjia mund të diagnostikonte sëmundje vetëm me disa pika gjaku.
Theranos, një bashkim i fjalëve “Therapy” (Terapi) dhe “Diagnosis” (Diagnozë), premtonte që vetëm nëpërmjet një pike gjaku nga një e shpuar pa dhimbje e majës së gishtit dhe nëpërmjet një makinerie, të zbulonte të gjitha sëmundjet e mundshme, të dallueshme nëpërmjet gjakut.
Të gjitha mediat shkruan për të, përfshirë Time, Forbes, New Yorker etj. Holmes kaloi nga një e panjohur në një emër të komentuar në Silicon Valley dhe arriti të grumbullonte miliarda dollarë pasuri duke mashtruar investitorët. Ajo u konsiderua mbretëresha e Silicon Valley-t të dominuar nga burra.
Por hetimet tregun se pas historisë së suksesit të Theranos-it, fshiheshin procedura laboratorike dhe rezultate të dyshimta. Prokurorët e përshkruan atë si një sharlatan të fiksuar pas famës dhe pasurisë.
