"Amici", një produksion artistik në Itali që i ka mirëpritur prej vitesh shqiptarët e talentuar, tani do të mbërrijë në Shqipëri. Burime për Anabel.al bëjnë me dije se producentja dhe moderatorja Alketa Vejsiu ka marrë patentën e programit të famshëm italian.
Po të njëjtat burime zbulojnë se produksioni ka nisur nga puna për ndërtimin e të gjitha strukturave që e bëjnë Amici-n një akademi. Për momentin, është e paqartë se kur do të fillojë talent show.
Vejsiu konfirmoi lajmin duke ripostuar artikullin e Anabel.
I njohur fillimisht si “Saranno famosi”, “Amici” është talent show më i gjatë në televizionin italian. I konceptuar dhe drejtuar nga Maria De Filippi, “Amici” u transmetua për herë të parë në vitin 2001. “Amici” është një shkollë, në formën e akademisë, për të gjithë të rinjtë që aspirojnë të bëhen balerinë profesionistë, këngëtarë, muzikantë etj. Konkurrentët ndjekin mësime të lëndëve të ndryshme, filmohen nga kamerat dhe qëndrojnë në një godinë të posaçme.
Siç e thamë edhe në hyrje të artikullit, programi ka qenë gjithmonë mikpritës për talentet me origjinë shqiptare, ku përmendim këtu Kledi Kadiun dhe Ilir Shaqirin të cilët ishin të parët që shkelën në skenën e "Amici" si balerinë profesionistë që në sezonin e parë të talent show dhe padyshim u hapën rrugën edhe artistëve të tjerë shqiparë; balerina Anbeta Toromani konkurroi në program në sezonin 2002-2003 dhe u rendit e dyta në finale; në sezonin 2003-2004 balerini shqiptar Leon Cino u shpall fitues; Olti Shaqiri ishte një nga konkurrentët më të spikatur të kërcimit në sezonin 2003-2004; një vit më vonë, balerini Klajdi Selimi u rendit i treti; Klaudia Pepa preku finalen në sezonin 2014-2015; këngëtarët Ermal Meta dhe Anna Oxa (Ana Hoxha) kanë qenë pjesë e paneleve të jurisë.
