E ftuar dje në “Kurthin e Piter Pan”, Aurela Hoxha foli për jetën e saj si nënë e dy fëmijëve dhe tha se gjatë shtatzënisë nuk ka publikuar asnjë foto në rrjetet sociale, sepse nuk donte të komentohej për format fizike, por të shijonte ndjesinë e bukur të shtatzënisë.
“Është pak e vështirë kjo pamja ime e jashtme… që bëj një jetë të hapur. Megjithatë, nga ana tjetër prekem shumë në tema delikate kur publikoj fëmijën dhe komente të tilla më shqetësojnë shumë dhe kjo më bën që shumë gjëra të mia të mendohem dy herë para se t’i bëj publike", tha Aurela.
Ajo dha edhe një mesazh për nënat e ardhshme:
"Mesazhi im është për të gjitha ato vajzat që janë në pozicionin tim, nuk duhet të ndikohen shumë, aq më tepër në tema, si të sjellësh në jetë një fëmijë dhe gjëja e parë para se të vijë një urim janë format, sa ke marrë peshë dhe mendoj se nuk është një gjë e bukur. Mendoj se është gjëja më e bukur në jetë që të sjellësh në jetë një fëmijë. Nuk është aspak e vështirë që pastaj të kthehesh në format e tua. Mos e përjetoni si stres, por përjetojeni si gjënë më të bukur në botë dhe realisht ka qenë kjo arsyeja pse nuk kam publikuar fotot e mija sepse nuk doja të komentohesha për format e mia, ndërkohë që po përjetoja një ndjenjë aq të bukur sa është ajo e shtatzënisë”, u shpreh ajo.
Duke marrë shkas edhe nga komentet që njerëzit bëjnë rëndom nëpër rrjetet sociale, ku diskutojnë ndryshimet fizike që shtatzënia sjell, (marrim edhe shembullin e Einxhel Shkirës, e cila jo pak herë ka reaguar), mendojmë se duhet të risjellim në vëmendjen tuaj disa arsye se pse nuk duhet komentuar kurrë trupi i një gruaje shtatzënë:
Sepse është totalisht biolgjike
Shtatzënia sjell ndryshime të shumta në fizikun dhe humorin e grave dhe të gjitha këto janë tërësisht biologjike dhe normale. Një grua shtatzënë mban në trup një jetë të re dhe e vetmja gjë që duhet të bëjmë, është ta mbështesim dhe ndihmojmë, duke lënë mënjanë kritikat apo komentet negative.
Sepse nuk është koment dashamirës, por fyerje
Nuk ka rëndësi sa pozitiv është qëllimi yt, kur komenton negativisht trupin e një gruaje shtatzënë, është fyerje. Shprehje si: “Uaa, sa je shëndoshur”, ose “Sa e dobët ke qenë” nuk kanë asgjë dashamirëse në thelb.
Komente të tilla ndikojnë në gjendjen psikologjike të grave
Sipas Incollingo Rodriguez, studiues dhe profesor i psikologjisë në “Worcester Polytechnic Institute”, ka një problem të madh me komentet e tilla, pasi sjellin pasoja që reflektohen në shëndetin e nënës dhe rrjedhimisht, edhe të fëmijës.
“Studimet kanë treguar se stresi i tillë në shtatzëni, mund të sjellë probleme me aftësitë konjitive ose sjelljen e fëmijëve. Gjithashtu, shkakton edhe probleme që lidhen me dhënien e gjirit”, shprehet ai. Kjo sjell edhe ngrënien emocionale, e cila ndikon në dietën dhe shëndetin fizik të nënës dhe fëmijës.
Sepse nuk është aspak puna jonë
Se ç’ndodh me trupin e një gruaje, nuk është aspak puna jonë. Nëse ajo zgjedh të shijojë shtatzëninë dhe të mos mendojë për kilogramët, pse duhet ta bëjmë ne?
Artikuj të sugjeruar:
