Justin Bieber ka shitur katalogun muzikor, duke u bërë pjesë e një liste në rritje të artistëve që kanë nënshkruar marrëveshje për të drejtat. Bieber ia shiti katalogun e tij Hipgnosis, njoftoi të martën kompania e investimeve.

“Për 15 vjet kam qenë mirënjohës që jam dëshmitar i këtij udhëtimi dhe sot jam i lumtur për të gjithë ata që janë përfshirë. Madhështia e Justin-it sapo ka filluar,” tha menaxheri i tij, Scooter Braun.

Marrëveshja vlerësohet në 200 milionë dollarë, sipas Billboard. Rolling Stone e cilësoi shifrën si më të madhen referuar artistëve të gjeneratës së Bieber.

Kur një katalog muzikor shitet, 100% e interesit të autorit dhe të kompozitorit – të gjitha të ardhurat dhe të drejtat në secilën këngë – zakonisht hiqen. Pra, që një artist të shesë pjesën e tij do të thotë se ai do të heqë dorë nga përqindja e tij në ato këngë dhe çdo fitim i ardhshëm.

Bob Dylan, Bruce Springsteen, Neil Young, Stevie Nicks, Justin Timberlake, Sting etj., kanë shitur së fundmi të drejtat për këngët e tyre. Shakira gjithashtu ka shitur të drejtat për hite si "Hips Don't Lie", "Whenever, Wherever" dhe "She Wolf".

E vetmja që po vepron ndryshe, me strategjinë e kundër, është Taylor Swift. Prej kohësh, Swift po lufton për të ruajtur krijimet e saj dhe po regjistron sërish këngët për të cilat nuk gëzon të drejtat.