Europianët po përjetojnë një “valë antisemitizmi”, zbulon sondazhi

Europa po përjeton "një valë antisemitizmi" të shkaktuar pjesërisht nga konflikti në Lindjen e Mesme, ka thënë agjencia kryesore e BE-së për të drejtat e njeriut, teksa publikoi një sondazh që zbuloi se pothuajse të gjithë të anketuarit raportuan paragjykime të kohëve të fundit anti-hebraike.

“Europa po përjeton një valë antisemitizmi, pjesërisht të nxitur nga konflikti në Lindjen e Mesme”, tha drejtoresha e agjencisë, Sirpa Rautio. “Kjo kufizon ashpër aftësinë e popullit hebre për të jetuar të sigurt dhe me dinjitet. Ne duhet të ndërtojmë ligjet dhe strategjitë ekzistuese për të mbrojtur komunitetet nga të gjitha format e urrejtjes, si në internet ashtu edhe jashtë tij.”

Gaza/ Ushtria izraelite shton sulmet

Ushtria izraelite urdhëroi civilët palestinezë që të largohen nga zona ku ndodhej selia e agjencisë UNRWA. Urdhri erdhi një ditë pasi 27 njerëz u vranë dhe 53 persona të tjerë u plagosën në një sulm në një shkollë që strehonte civilët.

Ministria e Shëndetësisë në Gaza bëri një përditësim mbi bilancin e viktimave të vrara në Gaza, duke njoftuar se 38,295 njerëz kanë ndërruar jetë që prej 7 tetorit të vitit 2023.

Zelensky i bën thirrje SHBA të ndihmojë Ukrainën

Presidenti ukrainas, Volodymyr Zelensky, bëri thirrje që liderët në SHBA të ndihmojnë Ukrainën dhe të mos presin nëntorin, por të veprojnë tani. Ai nxiti udhëheqësve që të ndihmojnë vendin e pushtuar nga Rusia dhe të mos presin rezultatin e zgjedhjeve në nëntor.

Zelensky theksoi se është momenti që të merren vendime të prera dhe të veprohet menjëherë dhe të mos presin muajt e ardhshëm.

Liberi/ Presidenti ul pagën e tij me 40%

Presidenti i Liberisë, Joseph Boakai, njoftoi se do të ulë pagën e tij me 40%. Zyra e tij u shpreh se presidenti synon të krijojë një qeverisje më të përgjegjshme dhe të tregojë solidaritet me shtetasit.

Pagat e qeveritarëve kanë qenë një çështje e diskutuar në Liberi, pasi shpeshherë qytetarët janë ankuar për kostot e larta të jetesës. 1/5 persona jetojnë me më pak se 2 dollarë/dita, në kushte të vështira.