Getty Images

Supermodelja gjermane Tatjana Patitz është ndarë sot nga jeta, për shkaqe që ende nuk janë bërë publike, duke lënë pas një trashëgimi të pasur me momente ikonike nga paraqitjet e saj nëpër pasarela.

E cilësuar si një prej “modeleve europiane më shik”, Tatjana u bë shumë e famshme në vitin 1988, kur u fotografua nga legjendari Peter Lindbergh.

Një nga momentet më të bukura të karrierës së saj është kur u bë pjesë e prezantimit të koleksionit “Freedom ‘90”, i krijuar nga George Michael. Tatjana eci në pasarelë së bashku me Cindy Crawford, Christy Turlington, Naomi Campbell dhe Linda Evangelista.

Gjatë karrierës së saj, Tatjana modeloi për marka të mirënjohura si: Chanel, Donna Karan, Vivienne Westwood dhe shumë të tjera. Shfaqja e saj e fundit do të ishte në 2019-ën, në Javën e Modës në Milano, ku ajo prezantoi veshje të koleksioni vjeshtë-dimër të markës Etro.

Ajo lindi në 25 mars të vitit 1966 në Hambur dhe ishte nëna e një djali, Jonah, i cili ka lindur në nëntor të 2004-ës. Patitz kishte një dashuri të jashtëzakonshme, veçanërisht për kuajt dhe madje ishte ambasadore e “American Wild Horse Sanctuary”.

Edhe pse supermodelja zgjodhi një jetë private, larg tapetit të kuq dhe paparacëve, duke e rritur djalin e saj në privatësi, sërish karriera e saj është fantastike dhe ikonike.

Getty Images