Princ Harry është kritikuar nga figura të rëndësishme britanike që kanë lidhje me sigurinë kombëtare dhe ushtrinë, pasi pretendoi në librin e tij autobiografik, “Spare”, se ka vrarë 25 luftëtarë talibanë kur shërbente për Ushtrinë Britanike në Afganistan.
Sipas The Daily Telegraph, që ka marrë një kopje të versionit spanjoll të librit përpara publikimit zyrtar të martën, 10 janar, Harry shkruan: “Numri im është 25. Nuk është një numër që më mbush me kënaqësi, por as nuk më vë në siklet.”
Në një paragraf tjetër, ai citohet t'i ketë përshkruar kryengritësit talibanë si "gurë shahu" që hiqen nga tabela dhe jo si njerëz.
Komentet e princit u kritikuan ashpër nga anëtarët e komunitetit ushtarak, ku figurat kryesore thonë se ato mund të rrezikojnë sigurinë e tij dhe t'i japin ushtrisë britanike një reputacion të keq.
Ish-këshilltari i sigurisë kombëtare në Mbretërinë e Bashkuar, Kim Darroch, tha për Sky News se do ta kishte këshilluar Harry-n të mos bënte deklarata. Koloneli Richard Kemp tha se komentet "njollosën" reputacionin e tij dhe atë të ushtrisë britanike.
“Problemi tjetër që gjeta në komentet e tij ishte se ai e bëri Ushtrinë Britanike të dukej sikur në thelb se e kishte trajnuar atë dhe ushtarët e tjerë për ta parë armikun si më pak se njeri, ashtu si gurët e shahut në një dërrasë për t'u hequr, gjë që nuk është kështu. Është e kundërta,” shtoi ai.
Talibanët, të cilët u kthyen në pushtet në vitin 2021 pas dy dekadash, iu përgjigjën me zemërim komenteve të Harry-t. "Zoti, Harry! Ata që vratë nuk ishin gurë shahu, ishin njerëz; ata kishin familje që prisnin kthimin e tyre,” tha një anëtar i grupit të talibanëve.
Ish-marinsi Ben McBean, me të cilin Harry shërbeu së bashku në Afganistan, shkroi në Twitter: "Të dua Princ Harry, por duhet të heshtësh! Duhet të pyesësh veten për njerëzit me të cilët po shoqërohesh. Nëse do të ishin njerëz të mirë, dikush deri tani do të të kishte thënë të ndaloje.”
Princi Harry shërbeu në ushtrinë britanike për 10 vjet. Libri i tij “Spare” ka nxitur sërish tensione në mbretëri.
