Mbrëmë, në @anabel.entertainment u hap një tematikë aktuale, e cila me gjasa, lëndoi ca njerëz. Tema ishte: “Dhuratat që keni marrë VS dhuratat që do të donit të kishit marrë” dhe shumë persona u shprehën se nuk kishin marrë asgjë për Krishtlindje.
Krishtlindja, vetë si festë, nënkupton shpirtin e bashkimit dhe shkëmbimit të dhuratave kuptimplota mes njerëzve të dashur dhe fakti që ndoshta nuk ke marrë një dhuratë, mund të të japë ndjesinë sikur personi tjetër nuk ka menduar për ty. Na lër të të themi se po, të mirëkuptojmë nëse je nxehur me të, është reagim mëse i pritshëm.
Por, si fillim, duhet ta kuptosh që ndoshta dhuratat nuk kanë për personin tjetër rëndësinë që kanë për ty. Domethënë, nëse nuk të ka blerë diçka për Krishtlindje, jo domosdoshmërisht nënkupton që ai/ajo nuk të do më, apo nuk mendon për ty.
Pra, nëse ti nuk merr një dhuratë për festa, nuk ka nevojë për panik, pasi gjithçka varet nga rrethanat. Për shembull, shpirti yt binjak ndoshta e ka harruar fare datën, ose mbase thellë-thellë është një Grinch që nuk e vjedh, por as nuk e ka qejf Krishtlindjen, në rastin më të keq, ndoshta nuk ka pasur mundësi ekonomike, sepse hej, është data 25 dhe festat kanë shumë shpenzime. Duam të themi që mos dil menjëherë në përfundime!
Por, tani ndodhemi para faktit që ai/ajo nuk të bleu gjë. Si duhet të sillesh ti?
Mos e bëj të madhe!
Lidhja jote vlen më shumë se një dhuratë e vetme në një ditë të shënuar. Mund të nxehesh dhe t’ia thuash, por mos i mbaj inat për shumë gjatë. Jepi një shans tjetër sepse Viti i Ri po vjen.
Mos shpenzo para që të ndihesh më mirë
Vetëm se ai/ajo nuk të bleu gjë, nuk do të thotë që t’i lësh paratë në qendrat tregtare. Kjo nuk të sjell asnjë përfitim, përkundrazi vetëm dëme në financa. Nuk po themi të mos i blesh vetes dhuratë, po themi të mos blesh pa fund dhurata!
Kujtohu që ka plot ditë të tjera
Ka edhe 364 (ose 365) ditë të tjera në të cilat ti mund të marrësh dhurata! Nuk ka rëndësi nëse nuk more këtë radhë, pavarësisht sa kuptimplotë dhe simbolike mund të jetë festa për ty.
Fol me partnerin/en
Tregoji atij/asaj se sa rëndësi ka kjo festë për ty. Je mjaftueshëm i/e rritur që ta pyesësh për mungesën e dhuratës, për financat dhe për gjithçka tjetër.
Dëgjo arsyen e personit tjetër
Është shumë e rëndësishme që ta dëgjosh arsyen e personit përballë, pasi në këtë mënyrë do të dish si të veprosh. Lëre të shpjegohet se çfarë ndodhi dhe pse nuk mendoi të të blinte një dhuratë dhe nëse është nevoja, më pas nevrikosu (varet nëse është arsye apo justifikim).
Llasto veten dhe bliji një dhuratë
Askush më mirë se ti nuk e di se çfarë do, ndaj ke ditë të tjera përpara. Kërko atë që do dhe merre! Veçse, siç thamë edhe më sipër, mos e tepro!
